ವಿಡಿಯೋ: ವಿಧಾನಸಭೆ ಅಧಿವೇಶನಕ್ಕೆ ಚಿರತೆಯಂತೆ ಬಟ್ಟೆ ಧರಿಸಿ ಬಂದ ಶಾಸಕ!

ಮಾನವ ಮತ್ತು ಕಾಡು ಪ್ರಾಣಿಗಳ ನಡುವಿನ ಸಂಘರ್ಷ ಎಲ್ಲಾ ರಾಜ್ಯಗಳಲ್ಲಿಯೂ ಹೆಚ್ಚಾಗುತ್ತಿದೆ. ಈ ಕುರಿತು ಸರ್ಕಾರದ ಗಮನ ಸೆಳೆಯಲು ಶಾಸಕರೊಬ್ಬರು ವಿಧಾಸಭೆ ಅಧಿವೇಶನಕ್ಕೆ ಚಿರತೆಯನ್ನು ಹೋಲುವ ಬಟ್ಟೆ ಧರಿಸಿ ಆಗಮಿಸುವ ಮೂಲಕ ಗಮನ ಸೆಳೆದಿದ್ದಾರೆ.

ಮಹಾರಾಷ್ಟ್ರ ರಾಜ್ಯದಲ್ಲಿ ವಿಧಾನಮಂಡಲ ಚಳಿಗಾಲದ ಅಧಿವೇಶನ ನಡೆಯುತ್ತಿದೆ. ಜುನ್ನಾರ್ ವಿಧಾನಸಭಾ ಕ್ಷೇತ್ರದ ಶಾಸಕ ಶರದ್ ಸೋನವನೆ ಬುಧವಾರ ವಿಧಾನಸಭೆಗೆ ಚಿರತೆಯಂತೆ ಕಾಣುವ ಬಟ್ಟೆ ಧರಿಸಿ ಆಗಮಿಸಿದ್ದರು.

ಮಾಧ್ಯಮಗಳ ಜೊತೆ ಮಾತನಾಡಿದ ಶಾಸಕರು, “ರಾಜ್ಯದಲ್ಲಿ ಹೆಚ್ಚುತ್ತಿರುವ ಚಿರತೆ ದಾಳಿ ಪ್ರಕರಣಗಳ ವಿರುದ್ಧ ಪ್ರತಿಭಟನೆ ನಡೆಸಲು ಚಿರತೆ ಮಾದರಿ ಉಡುಪು ತೊಟ್ಟು ವಿಧಾನಸಭೆಗೆ ಆಗಮಿಸಿದ್ದೇನೆ” ಎಂದು ಹೇಳಿದರು.

“ರಾಜ್ಯದಲ್ಲಿ ನಡೆಯುತ್ತಿರುವ ಚಿರತೆ ದಾಳಿಗಳಿಗೆ ತುರ್ತು ಪರಿಸ್ಥಿತಿ ಘೋಷಿಸಬೇಕು. 2014ರಿಂದಲೂ ನಾನು ಈ ವಿಚಾರದ ಕುರಿತು ಧ್ವನಿ ಎತ್ತುತ್ತಿದ್ದೇನೆ. ಆದರೆ ಸರ್ಕಾರ ನನ್ನನ್ನು ನಿರ್ಲಕ್ಷ್ಯ ಮಾಡುತ್ತಲೇ ಬಂದಿದೆ. ಚಿರತೆ ರಕ್ಷಣಾ ಕೇಂದ್ರಗಳನ್ನು ನಿರ್ಮಿಸಬೇಕು, ಚಿರತೆಗಳನ್ನು ಹಿಡಿದು ಆ ಕೇಂದ್ರಗಳಲ್ಲಿ ಇರಿಸಬೇಕು” ಎಂದು ಶಾಸಕರು ಆಗ್ರಹಿಸಿದರು.

“ರಾಜ್ಯದಲ್ಲಿ ಹೆಚ್ಚುತ್ತಿರುವ ಚಿರತೆ ದಾಳಿಗಳ ವಿರುದ್ಧ, ವಿಶೇಷವಾಗಿ ಪುಣೆ ಜಿಲ್ಲೆಯ ಗ್ರಾಮೀಣ ಭಾಗಗಳಾದ ಜುನರ್ ಮತ್ತು ಶಿರೂರಿನಲ್ಲಿ ಸಂಭವಿಸುತ್ತಿರುವ ಘಟನೆಗಳ ಬಗ್ಗೆ ಗಮನ ಸೆಳೆಯಲು ಈ ರೀತಿ ಉಡುಪು ಧರಿಸಿ ಬಂದಿದ್ದೇನೆ” ಎಂದು ಶಾಸಕರು ತಿಳಿಸಿದರು.

“ನನ್ನ ಕ್ಷೇತ್ರದಲ್ಲಿ ಕಳೆದ ಮೂರು ತಿಂಗಳಲ್ಲಿ 55 ಜನರು ಚಿರತೆ ದಾಳಿಯಿಂದ ಪ್ರಾಣ ಕಳೆದುಕೊಂಡಿದ್ದಾರೆ. 2014–15ರ ಚಳಿಗಾಲ ಅಧಿವೇಶನದಲ್ಲೇ ನಾನು ಸರ್ಕಾರವನ್ನು ಈ ವಿಷಯದ ಕುರಿತು ಎಚ್ಚರಿಸಿದ್ದೆ. ಸರ್ಕಾರ ಯಾವುದೇ ಕ್ರಮವನ್ನು ಕೈಗೊಂಡಿಲ್ಲ” ಎಂದು ಶಾಸಕರು ಆರೋಪ ಮಾಡಿದರು.

ಕಾಡಿಗೆ ಮೇಕೆಗಳನ್ನು ಬಿಡಿ: ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ಚಿರತೆ ದಾಳಿಗಳ ಕುರಿತು ಚರ್ಚೆಗಳು ನಡೆಯುತ್ತಿವೆ. ಮಂಗಳವಾರ ಅರಣ್ಯ ಸಚಿವ ಗಣೇಶ್ ನಾಯಕ್, “ಚಿರತೆಗಳು ಆಹಾರ ಹುಡುಕಾಟಕ್ಕಾಗಿ ಮಾನವ ವಸತಿ ಪ್ರದೇಶಗಳ ಕಡೆಗೆ ಬರದಂತೆ ಮಾಡಲು, ಕಾಡಿನಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮೇಕೆಗಳನ್ನು ಬಿಡುವಂತೆ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಸೂಚಿಸಲಾಗಿದೆ”ಎಂದು ಹೇಳಿದ್ದರು.

ರಾಜ್ಯದಲ್ಲಿ ಚಿರತೆ ದಾಳಿ ಪ್ರಕರಣ ಹೆಚ್ಚುತ್ತಿರುವ ಬಗ್ಗೆ ಎನ್‌ಸಿಪಿ (ಎಸ್‌ಪಿ) ಶಾಸಕ ಜಿತೇಂದ್ರ ಅವ್ಹಾಡ್ ವಿಧಾನಸಭೆಯಲ್ಲಿ ಗಮನ ಸೆಳೆಯವ ಸೂಚನೆ ಮಂಡಿಸಿದ್ದರು. ಆಗ ಮಾತನಾಡಿದ್ದ ಸಚಿವರು, “ಚಿರತೆ ದಾಳಿಯಲ್ಲಿ ನಾಲ್ವರು ಸತ್ತರೆ ರಾಜ್ಯ ಸರ್ಕಾರಕ್ಕೆ 1 ಕೋಟಿ ಪರಿಹಾರ ನೀಡಬೇಕಾಗುತ್ತದೆ. ಆದ್ದರಿಂದ, ಸಾವುಗಳ ನಂತರ ಪರಿಹಾರ ನೀಡುವುದಕ್ಕೆ ಬದಲಾಗಿ, 1 ಕೋಟಿ ರೂ.ಗಳ ಮೇಕೆಗಳನ್ನು ಕಾಡಿನಲ್ಲಿ ಬಿಡಿ, ಆಗ ಚಿರತೆಗಳು ಮಾನವ ವಸತಿ ಪ್ರದೇಶಗಳತ್ತ ಬರುವುದಿಲ್ಲ” ಎಂದು ಹೇಳಿದ್ದರು.

ಅರಣ್ಯ ಸಚಿವ ಗಣೇಶ್ ನಾಯಕ್, “ಚಿರತೆ ದಾಳಿಯ ಆತಂಕ ಹೆಚ್ಚಾಗಿ ವರದಿಯಾಗುತ್ತಿರುವ ಪ್ರದೇಶಗಳಲ್ಲಿ ಮೇಕೆಯನ್ನು ಕಾಡಿಗೆ ಬಿಡುವುದನ್ನು ಶೀಘ್ರದಲ್ಲೇ ಜಾರಿಗೆ ತರುತ್ತೇವೆ.  ಚಿರತೆಗಳ ವರ್ತನೆ ಮತ್ತು ಜೀವನಶೈಲಿಯಲ್ಲಿ ಬದಲಾವಣೆ ಕಂಡುಬಂದಿದೆ. ಹಿಂದೆ ಅವುಗಳನ್ನು ಕಾಡು ಪ್ರಾಣಿಗಳೆಂದು ಕರೆಯಲಾಗುತ್ತಿತ್ತು, ಆದರೆ ಈಗ ಅವು ಕಬ್ಬಿನ ಹೊಲಗಳಲ್ಲಿ ವಾಸಿಸುತ್ತಿವೆ” ಎಂದು ವಿವರಣೆ ನೀಡಿದ್ದರು.

“ಅಹಿಲ್ಯಾ ನಗರ, ಪುಣೆ ಮತ್ತು ನಾಸಿಕ್ ಜಿಲ್ಲೆಗಳಲ್ಲಿ ಚಿರತೆ ದಾಳಿ ಸಂಬಂಧಿತ ಘಟನೆಗಳು ಹೆಚ್ಚಾಗಿ ನಡೆಯುತ್ತಿವೆ. ಹೆಣ್ಣು ಚಿರತೆಗಳು ನಾಲ್ಕು ಮರಿಗಳಿಗೆ ಜನ್ಮ ನೀಡುತ್ತಿವೆ. ಆದ್ದರಿಂದ ಚಿರತೆಗಳ ಸಂಖ್ಯೆಯೂ ಹೆಚ್ಚಾಗುತ್ತಿದೆ” ಎಂದು ಹೇಳಿದ್ದರು.