ಎಂಡೋಸ್ಕೋಪಿ ನೋವಿಗೆ ಇನ್ಮುಂದೆ ಗುಡ್ ಬೈ! ನುಂಗಿದರೆ ಸಾಕು ರೋಗ ಪತ್ತೆ ಹಚ್ಚುತ್ತೆ ಈ ಅಕ್ಕಿಕಾಳು ಗಾತ್ರದ ರೋಬೋಟ್

ಹೊಸ ದೆಹಲಿ: ಸೈನ್ಸ್ ಫಿಕ್ಷನ್ ಸಿನಿಮಾದಲ್ಲಿ ನೀವು ಒಂದು ಪುಟ್ಟ ರೋಬೋಟ್ ಅನ್ನು ನುಂಗುವುದು, ಅದು ದೇಹದ ಒಳಗೆ ಹೋಗಿ ರೋಗ ಪತ್ತೆ ಹಚ್ಚುವುದನ್ನು ನೋಡಿರಬಹುದು. ಈಗ ಅಂತಹದ್ದೇ ಒಂದು ಅದ್ಭುತವನ್ನು ಐಐಟಿ ದೆಹಲಿ ಮತ್ತು ಏಮ್ಸ್ (AIIMS) ವಿಜ್ಞಾನಿಗಳು ನನಸು ಮಾಡಿದ್ದಾರೆ. ಅಕ್ಕಿ ಕಾಳಿಗಿಂತಲೂ ಚಿಕ್ಕದಾದ, ನುಂಗಬಹುದಾದ ‘ಮೈಕ್ರೋ ಡಿವೈಸ್’ (Swallowable Microdevice) ಒಂದನ್ನು ಸಂಶೋಧಕರು ಅಭಿವೃದ್ಧಿಪಡಿಸಿದ್ದು, ಇದು ಎಂಡೋಸ್ಕೋಪಿಯಂತಹ ನೋವಿನ ಪರೀಕ್ಷೆಗಳಿಗೆ ಮುಕ್ತಿ ನೀಡಲಿದೆ.

ಎಂಡೋಸ್ಕೋಪಿ ಕಿರಿಕಿರಿ ಇನ್ಮುಂದೆ ಇರಲ್ಲ

ಇಂದಿನವರೆಗೆ ಹೊಟ್ಟೆ ಮತ್ತು ಕರುಳಿನ ಪರೀಕ್ಷೆಗೆ ಎಂಡೋಸ್ಕೋಪಿ ಅನಿವಾರ್ಯವಾಗಿತ್ತು. ಆದರೆ, ಗಂಟಲಿನ ಮೂಲಕ ನಳಿಕೆಯನ್ನು ಬಿಟ್ಟು ಮಾಡುವ ಈ ಪರೀಕ್ಷೆ ರೋಗಿಗೆ ತೀವ್ರ ಅಸ್ವಸ್ಥತೆ ಮತ್ತು ನೋವು ನೀಡುತ್ತಿತ್ತು. ಅಲ್ಲದೆ, ಇಷ್ಟೆಲ್ಲಾ ಕಷ್ಟಪಟ್ಟರೂ ಕರುಳಿನ ಒಳಭಾಗದ ನಿಖರ ಮಾಹಿತಿ ಸಿಗುತ್ತಿರಲಿಲ್ಲ. ಇನ್ನು ಮಲದ ಪರೀಕ್ಷೆಯು ಕರುಳಿನ ಮೇಲ್ಭಾಗದ ಬ್ಯಾಕ್ಟೀರಿಯಾಗಳ ಬಗ್ಗೆ ಸರಿಯಾದ ಸುಳಿವು ನೀಡುತ್ತಿರಲಿಲ್ಲ. ಈ ಎಲ್ಲಾ ಸಮಸ್ಯೆಗಳಿಗೆ ಐಐಟಿ ದೆಹಲಿಯ ಈ ಪುಟ್ಟ ಸಾಧನವೇ ಪರಿಹಾರ.

ಹೇಗೆ ಕಾರ್ಯನಿರ್ವಹಿಸುತ್ತದೆ ಈ ‘ಮ್ಯಾಜಿಕ್ ಚಿಪ್’?

ಐಐಟಿ ದೆಹಲಿಯ ಪ್ರೊ. ಸರ್ವೇಶ್ ಕುಮಾರ್ ಶ್ರೀವಾಸ್ತವ ಅವರ ಪ್ರಕಾರ, ಈ ಸಾಧನವು ದೇಹದ ಒಳಗಿನ ಗುಪ್ತ ಜಗತ್ತನ್ನು ಅನ್ವೇಷಿಸುವ ರೋವರ್ ಇದ್ದಂತೆ. ಇದರ ಕಾರ್ಯವೈಖರಿ ಹೀಗಿದೆ:

ರೋಗಿ ಈ ಸಣ್ಣ ಗುಳಿಗೆಯನ್ನು ನುಂಗಿದಾಗ, ಅದು ಜಠರದಲ್ಲಿರುವ ಆಮ್ಲಗಳಿಗೆ ಪ್ರತಿಕ್ರಿಯಿಸದೆ ಸಂಪೂರ್ಣವಾಗಿ ಮುಚ್ಚಿಕೊಂಡಿರುತ್ತದೆ.

ಇದು ಸಣ್ಣ ಕರುಳನ್ನು ತಲುಪಿದಾಗ ಮಾತ್ರ ಸ್ವಯಂಚಾಲಿತವಾಗಿ ತೆರೆದುಕೊಳ್ಳುತ್ತದೆ ಮತ್ತು ಅಲ್ಲಿನ ಬ್ಯಾಕ್ಟೀರಿಯಾಗಳ ಮಾದರಿಯನ್ನು ಸಂಗ್ರಹಿಸುತ್ತದೆ.

ಮಾದರಿ ಸಂಗ್ರಹವಾದ ಕೂಡಲೇ ಇದು ಮತ್ತೆ ಗಟ್ಟಿಯಾಗಿ ಮುಚ್ಚಿಕೊಳ್ಳುತ್ತದೆ. ಇದರಿಂದ ಮಾದರಿಯು ಕಲುಷಿತಗೊಳ್ಳುವುದಿಲ್ಲ.

ಕೆಲಸ ಮುಗಿದ ನಂತರ ಈ ಸಾಧನವು ಮಲದ ಮೂಲಕ ದೇಹದಿಂದ ಹೊರಬರುತ್ತದೆ. ಬಳಿಕ ಪ್ರಯೋಗಾಲಯದಲ್ಲಿ ಇದನ್ನು ಪರೀಕ್ಷಿಸಿ ರೋಗದ ಮೂಲವನ್ನು ನಿಖರವಾಗಿ ಪತ್ತೆಹಚ್ಚಬಹುದು.

ನಮ್ಮ ದೇಹದೊಳಗಿನ ರಹಸ್ಯ ಜಗತ್ತು

ನಮ್ಮ ದೇಹದ ಅರ್ಧದಷ್ಟು ಜೀವಕೋಶಗಳು ಸೂಕ್ಷ್ಮಜೀವಿಗಳಿಂದ (Microbes) ಕೂಡಿವೆ. ಇವು ನಮ್ಮ ಜೀರ್ಣಕ್ರಿಯೆ, ರೋಗನಿರೋಧಕ ಶಕ್ತಿ ಮತ್ತು ಮಾನಸಿಕ ಆರೋಗ್ಯದ ಮೇಲೆ ಭಾರಿ ಪ್ರಭಾವ ಬೀರುತ್ತವೆ. ಸಣ್ಣ ಕರುಳಿನ ಈ ಸೂಕ್ಷ್ಮಜೀವಿಗಳನ್ನು ಅರ್ಥಮಾಡಿಕೊಳ್ಳುವುದು ಕ್ಯಾನ್ಸರ್ ಅಥವಾ ದೀರ್ಘಕಾಲದ ಕಾಯಿಲೆಗಳ ಆರಂಭಿಕ ಪತ್ತೆಗೆ ಬಹಳ ಮುಖ್ಯ, ಎನ್ನುತ್ತಾರೆ ಏಮ್ಸ್‌ನ ಡಾ. ಸಮಗ್ರ ಅಗರ್ವಾಲ್.

ಭಾರತೀಯರಿಗೆ ಸಿಗಲಿದೆ ಈ ತಂತ್ರಜ್ಞಾನ
ಐಸಿಎಂಆರ್ (ICMR) ಧನಸಹಾಯದೊಂದಿಗೆ ಅಭಿವೃದ್ಧಿಪಡಿಸಲಾದ ಈ ಸಾಧನಕ್ಕೆ ಈಗಾಗಲೇ ಪೇಟೆಂಟ್ ಸಲ್ಲಿಸಲಾಗಿದೆ. ಪ್ರಾಣಿಗಳ ಮೇಲಿನ ಪ್ರಯೋಗ ಯಶಸ್ವಿಯಾಗಿದ್ದು, ಅಗತ್ಯ ಅನುಮೋದನೆಗಳ ನಂತರ ಇದು ಜನಸಾಮಾನ್ಯರ ಬಳಕೆಗೆ ಬರಲಿದೆ. ಇದು ಕಡಿಮೆ ವೆಚ್ಚದ ಮತ್ತು ನೋವಿಲ್ಲದ ‘ವೈಯಕ್ತಿಕ ವೈದ್ಯಕೀಯ ಚಿಕಿತ್ಸೆ’ಗೆ (Personalised Medicine) ಹೊಸ ಹಾದಿ ಮಾಡಿಕೊಡಲಿದೆ.