ನಿನ್ನೆ (ಫೆಬ್ರವರಿ 2 ) ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ಭಾರತ ಹಾಗೂ ಇಂಗ್ಲೆಂಡ್ ತಂಡಗಳ ನಡುವಿನ ಪಂದ್ಯದಲ್ಲಿ ಭಾರತ 150 ರನ್‌ಗಳ ಭರ್ಜರಿ ಗೆಲುವು ದಾಖಲಿಸುವುದರ ಮೂಲಕ 5 ಪಂದ್ಯಗಳ ಟಿ20 ಸರಣಿಯನ್ನು 4-1 ಅಂತರದಿಂದ ಗೆದ್ದು ಬೀಗಿದೆ.
ಇನ್ನು ಅಂತಿಮ ಪಂದ್ಯದಲ್ಲಿ ಭಾರತ ಬೃಹತ್‌ ಮೊತ್ತ ಗಳಿಸಲು ಕಾರಣರಾದ ಅಭಿಷೇಕ್ ಶರ್ಮಾ 54 ಎಸೆತಗಳಲ್ಲಿ 7 ಬೌಂಡರಿ, 13 ಸಿಕ್ಸರ್‌ ಸೇರಿದಂತೆ 135 ರನ್‌ ಬಾರಿಸಿ ದಾಖಲೆಯ ಆಟವನ್ನಾಡಿದರು. ಹೀಗೆ ಒಂದೇ ಇನ್ನಿಂಗ್ಸ್‌ನಲ್ಲಿ 13 ಸಿಕ್ಸರ್‌ ಬಾರಿಸಿ ಅಬ್ಬರಿಸಿರುವ ಅಭಿಷೇಕ್ ಶರ್ಮಾ ಬ್ಯಾಟಿಂಗ್ ವೈಖರಿ ಕಂಡು ಇಡೀ ಕ್ರಿಕೆಟ್ ಜಗತ್ತೇ ಫಿದಾ ಆಗಿದೆ.
ಅಭಿಷೇಕ್ ಶರ್ಮಾ ಭರ್ಜರಿ ಬ್ಯಾಟಿಂಗ್ ಕುರಿತು ದಿಗ್ಗಜ ಕ್ರಿಕೆಟಿಗರೂ ಸಹ ಮಾತನಾಡಿ ಹೊಗಳಿದ್ದು, ಇದೀಗ ಇಂಗ್ಲೆಂಡ್‌ನ ಮಾಜಿ ಕ್ರಿಕೆಟಿಗ ಅಲಸ್ಟೈರ್‌ ಕುಕ್‌ ನನ್ನ ವೃತ್ತಿ ಜೀವನದ ಸಿಕ್ಸರ್‌ಗಳನ್ನೆಲ್ಲಾ ಅಭಿಷೇಕ್ ಶರ್ಮಾ ಒಂದೇ ಪಂದ್ಯದಲ್ಲಿ ಬಾರಿಸಿದರು ಎಂದು ಹೇಳಿಕೆ ನೀಡುವುದರ ಮೂಲಕ ಪ್ರಶಂಸಿಸಿದ್ದಾರೆ.
ಹೌದು, ಪಂದ್ಯ ವೀಕ್ಷಿಸಿದ ಬಳಿಕ ಮಾತನಾಡಿದ ಅವರು ನಾನು ನನ್ನ ವೃತ್ತಿ ಜೀವನದುದ್ದಕ್ಕೂ ಬಾರಿಸಿದ ಎಲ್ಲಾ ಸಿಕ್ಸರ್‌ಗಳನ್ನೂ ಅಭಿಷೇಕ್ ಶರ್ಮಾ ಕೇವಲ ಎರಡು ಗಂಟೆಗಳಲ್ಲಿಯೇ ಬಾರಿಸಿಬಿಟ್ಟರು ಎಂದು ಕುಕ್‌ ಹೇಳಿಕೊಂಡಿದ್ದಾರೆ.
ಅಂದಹಾಗೆ ಇಂಗ್ಲೆಂಡ್‌ನ ಅಲಸ್ಟೈರ್‌ ಕುಕ್‌ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಒಟ್ಟು 11 ಸಿಕ್ಸರ್‌ ಬಾರಿಸಿದ್ದು, ಏಕದಿನ ಕ್ರಿಕೆಟ್‌ನಲ್ಲಿ 10 ಸಿಕ್ಸರ್‌ ಬಾರಿಸಿದ್ದಾರೆ ಹಾಗೂ ಇನ್ನುಳಿದಂತೆ ಕೇವಲ 4 ಟಿ20 ಪಂದ್ಯಗಳಲ್ಲಿ ಕಣಕ್ಕಿಳಿದಿರುವ ಕುಕ್‌ ಯಾವುದೇ ಸಿಕ್ಸರ್‌ ಬಾರಿಸಿಲ್ಲ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.