ಬೆಂಗಳೂರು: ಪಾಕಿಸ್ತಾನ ಕ್ರಿಕೆಟ್ ತಂಡದ ಬಾಬರ್ ಆಜಮ್ ಇನ್ಸ್ಟಾಗ್ರಾಂ ಸ್ಟೋರಿಯೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು. ಆ ಸ್ಟೋರಿಯಲ್ಲಿ ಅವರು ಭಾರತದಲ್ಲಿ ತಮ್ಮ ಖಾತೆ ನಿಷೇಧಗೊಂಡಿರುವ ಬಗ್ಗೆ ಹಾಗೂ ಪಾಕಿಸ್ತಾನ ಸೇನೆಯನ್ನು ಟೀಕಿಸಿರುವುದಾಗಿ ಹೇಳಲಾಗಿತ್ತು. ಆದರೆ ಈ ಸ್ಟೋರಿ ಸುಳ್ಳು ಎಂದು ಫ್ಯಾಕ್ಟ್ ಚೆಕ್ ಮೂಲಕ ದೃಢಪಟ್ಟಿದೆ.
ಸುಳ್ಳು ಸ್ಟೋರಿ ಬಯಲಿಗೆ @MensCricket ಎಂಬ ಖಾತೆಯು ಬಾಬರ್ ಆಜಮ್ ಅವರ ಇನ್ಸ್ಟಾಗ್ರಾಂ ಸ್ಟೋರಿ ಎಂದು ಒಂದು ಪೋಸ್ಟ್ ಹಂಚಿಕೊಂಡಿತ್ತು. ಇದರಲ್ಲಿ ಬಾಬರ್ ಅಜಮ್ ಪೆಹಲ್ಗಾಮ್ ದಾಳಿಗೂ ಪಾಕ್ ಕ್ರಿಕೆಟಿಗರಿಗೂ ಯಾವುದೇ ಸಂಬಂಧವಿಲ್ಲ, ಎಲ್ಲದಕ್ಕೂ ಕಾರಣ ಪಾಕ್ ಸೇನೆಯ ಕೊಳಕು ರಾಜಕೀಯ ಎಂದು ಬಾಬರ್ ಅಜಮ್ ಅವರ ಇನ್ಸ್ಟಾ ಸ್ಟೋರಿಯಲ್ಲಿ ಬರೆದುಕೊಂಡ ರೀತಿಯ ಫೋಟೊ ಇದರಲ್ಲಿತ್ತು.
ಭಾರತದಲ್ಲಿ ಪಾಕ್ ಸೆಲೆಬ್ರಿಟಿಗಳು ಹಾಗೂ ಕ್ರಿಕೆಟಿಗರ ಸಾಮಾಜಿಕ ಜಾಲತಾಣದ ಖಾತೆಗಳನ್ನು ಬ್ಯಾನ್ ಮಾಡಲಾಗಿದ್ದು, ಹಲವಾರು ಮಂದಿ ವೈರಲ್ ಆದ ಈ ಸುದ್ದಿಯನ್ನು ನಿಜವೆಂದು ನಂಬಿದರು.
ಆದರೆ, ಬಾಂಗ್ಲಾದೇಶದ @xafi_18 ಎಂಬ ಬಳಕೆದಾರರು ಈ ಸ್ಟೋರಿ ಸುಳ್ಳು ಎಂದು ಬಯಲಿಗೆಳೆದರು. ಬಾಬರ್ ಆಜಂ ಅವರ ನಿಜವಾದ ಇನ್ಸ್ಟಾಗ್ರಾಂ ಪ್ರೊಫೈಲ್ನ ಸ್ಕ್ರೀನ್ಶಾಟ್ ಹಂಚಿಕೊಂಡು, ಯಾವುದೇ ರಾಜಕೀಯ ಹೇಳಿಕೆ ಅಥವಾ ಆ ಸ್ಟೋರಿ ಇಲ್ಲ ಎಂದು ಸ್ಪಷ್ಟಪಡಿಸಿದರು. ಈ ಬೆಳವಣಿಗೆಯ ಬಳಿಕ ಮೆನ್ಸ್ಕ್ರಿಕೆಟ್ ಖಾತೆಯು ತಮ್ಮ ಪೋಸ್ಟ್ ಅನ್ನು ಡಿಲೀಟ್ ಮಾಡಿದ್ದು, ಸ್ಟೋರಿಯು ಸತ್ಯವಲ್ಲ ಎಂದು ದೃಢಪಟ್ಟಿದೆ.
ಭಾರತದಲ್ಲಿ ಖಾತೆ ನಿಷೇಧ ಸತ್ಯ
ಆದರೆ, ಬಾಬರ್ ಆಜಂ ಸೇರಿದಂತೆ ಹಲವು ಪಾಕಿಸ್ತಾನಿ ಸೆಲೆಬ್ರಿಟಿಗಳ ಇನ್ಸ್ಟಾಗ್ರಾಂ ಖಾತೆಗಳನ್ನು ಭಾರತದಲ್ಲಿ ನಿಷೇಧಿಸಲಾಗಿದೆ ಎಂಬುದು ಸತ್ಯ. ಏಪ್ರಿಲ್ 22, 2025 ರಂದು ಜಮ್ಮು-ಕಾಶ್ಮೀರದ ಪಹಲಗಾಂನಲ್ಲಿ ನಡೆದ ಭಯೋತ್ಪಾದಕ ದಾಳಿಯಲ್ಲಿ 26 ಮಂದಿ, ಹೆಚ್ಚಿನವರು ಹಿಂದೂ ಪ್ರವಾಸಿಗರು, ಸಾವನ್ನಪ್ಪಿದ್ದರು. ಈ ದಾಳಿಯನ್ನು ಪಾಕಿಸ್ತಾನ ಮೂಲದ ಲಷ್ಕರ್-ಎ-ತೊಯ್ಬಾ ಸಂಘಟನೆಯ ಪ್ರಾಕ್ಸಿ ಗುಂಪಾದ ದಿ ರೆಸಿಸ್ಟೆನ್ಸ್ ಫ್ರಂಟ್ ಹೊಣೆಗಾರಿಕೆ ಹೊತ್ತಿತ್ತು. ಈ ಘಟನೆಯ ಬಳಿಕ ಭಾರತ-ಪಾಕಿಸ್ತಾನ ನಡುವಿನ ಉದ್ವಿಗ್ನತೆ ಹೆಚ್ಚಾಗಿದ್ದು, ಭಾರತ ಸರ್ಕಾರವು ಬಾಬರ್ ಆಜಂ, ಶಾಹೀನ್ ಅಫ್ರಿದಿ, ಮೊಹಮ್ಮದ್ ರಿಝ್ವಾನ್ ಮುಂತಾದವರ ಇನ್ಸ್ಟಾಗ್ರಾಂ ಖಾತೆಗಳನ್ನು ನಿಷೇಧಿಸಿತು. ಇದರ ಜೊತೆಗೆ ಇಂಡಸ್ ವಾಟರ್ ಟ್ರೀಟಿ ಸ್ಥಗಿತಗೊಳಿಸುವುದು ಮತ್ತು ಪಾಕಿಸ್ತಾನಿ ನಾಗರಿಕರನ್ನು ದೇಶದಿಂದ ಹೊರಗೆ ಕಳುಹಿಸುವ ಕ್ರಮವನ್ನೂ ಭಾರತ ಕೈಗೊಂಡಿತು.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.