ದುಬೈ: ಇಲ್ಲಿನ ದುಬೈ ಅಂತರ್‌ರಾಷ್ಟ್ರೀಯ ಸ್ಟೇಡಿಯಂನಲ್ಲಿ ನಿನ್ನೆ (ಫೆಬ್ರವರಿ 20) ನಡೆದ ಭಾರತ ಹಾಗೂ ಬಾಂಗ್ಲಾದೇಶ ತಂಡಗಳ ನಡುವಿನ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ 2025ರ ಎರಡನೇ ಪಂದ್ಯದಲ್ಲಿ ಬಾಂಗ್ಲಾದೇಶದ ವಿರುದ್ಧ ಭಾರತ 6 ವಿಕೆಟ್‌ಗಳ ಗೆಲುವನ್ನು ಪಡೆದು ಟೂರ್ನಿಯಲ್ಲಿ ಶುಭಾರಂಭ ಮಾಡಿದೆ.
ಪಂದ್ಯದಲ್ಲಿ ಟಾಸ್‌ ಗೆದ್ದು ಬ್ಯಾಟಿಂಗ್ ಆರಿಸಿಕೊಂಡ ಬಾಂಗ್ಲಾದೇಶ 49.4 ಓವರ್‌ಗಳಲ್ಲಿ ವಿಕೆಟ್‌ ನಷ್ಟಕ್ಕೆ 228 ರನ್‌ ಕಲೆಹಾಕಿ 229 ರನ್‌ಗಳ ಗುರಿಯನ್ನು ನೀಡಿತ್ತು. ಈ ಗುರಿಯನ್ನು ಬೆನ್ನಟ್ಟಿದ ಭಾರತ 46.3 ಓವರ್‌ಗಳಲ್ಲಿ 4 ವಿಕೆಟ್‌ ನಷ್ಟಕ್ಕೆ 231 ರನ್‌ ಕಲೆಹಾಕಿತು.
ಬ್ಯಾಟಿಂಗ್‌ನಲ್ಲಿ ಶುಬ್‌ಮನ್‌ ಗಿಲ್‌ ಶತಕ ಬಾರಿಸಿ ಆರಂಭದಿಂದ ಅಂತ್ಯದವರೆಗೂ ಉತ್ತಮ ಪ್ರದರ್ಶನ ನೀಡಿದರೆ, ಬೌಲಿಂಗ್‌ನಲ್ಲಿ ಮೊಹಮ್ಮದ್‌ ಶಮಿ ಐದು ವಿಕೆಟ್‌ಗಳ ಗೊಂಚಲನ್ನು ಪಡೆದು ಮಿಂಚಿದರು.
ಇನ್ನು ಪಂದ್ಯ ಮುಕ್ತಾಯವಾದ ಬಳಿಕ ಗೆಲುವಿನ ಕುರಿತು ಮಾತನಾಡಿದ ಭಾರತದ ನಾಯಕ ರೋಹಿತ್ ಶರ್ಮಾ ಗೆಲುವಿಗೆ ಕಾರಣರಾದ ಆಟಗಾರರನ್ನು ಹೊಗಳಿದ್ದಾರೆ. ʼಆತನ ಬಗ್ಗೆ ನಮಗೆ ತುಂಬಾ ಖುಷಿ ಇದೆ. ಬಹಳ ದಿನಗಳ ಬಳಿಕ ತಂಡಕ್ಕೆ ಮರಳಿರುವ ಶಮಿ ಏನನ್ನು ಹೊತ್ತು ತಂದಿದ್ದಾರೆ ಎಂಬುದು ನಮಗೆ ತಿಳಿದಿದೆ. ನಮಗೆ ಅಗತ್ಯ ಬಿದ್ದಾಗ ಎದ್ದು ನಿಂತುವ ಶಮಿಯಂತಹ ಆಟಗಾರ ಬೇಕಿತ್ತುʼ ಎಂದು ಶಮಿಯನ್ನು ರೋಹಿತ್ ಹೊಗಳಿದರು.
ಅಲ್ಲದೇ ಗಿಲ್‌ ಶತಕವನ್ನೂ ಸಹ ಪ್ರಶಂಸಿಸಿದ ರೋಹಿತ್ ಗಿಲ್‌ ಕ್ಲಾಸ್‌ ಏನೆಂಬುದು ನಮಗೆಲ್ಲಾ ತಿಳಿದಿದೆ. ಆತನ ಆಟ ಆಶ್ಚರ್ಯವನ್ನೇನೂ ಉಂಟುಮಾಡಿಲ್ಲ ಎಂದು ಹೇಳುವ ಮೂಲಕ ಗಿಲ್‌ ಇಂತಹ ಉತ್ತಮ ಆಟವನ್ನಾಡಲಿದ್ದಾರೆ ಎಂದು ತಿಳಿಸಿದರು. ಗಿಲ್‌ ಜತೆಗೆ ಕೆಎಲ್‌ ರಾಹುಲ್‌ ಉತ್ತಮ ಆಟವನ್ನಾಡಿದರು ಎಂದು ರೋಹಿತ್ ಶರ್ಮಾ ಹೇಳಿದರು.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.