ಆರೋಗ್ಯಕರ ಹಾಗೂ ರುಚಿಕರ:ಮಕ್ಕಳಿಂದ ವೃದ್ಧರವರೆಗೂ ಇಷ್ಟವಾಗುವ ಮಿಶ್ರಸೊಪ್ಪಿನ ತಾಲಿಪಟ್ಟು

ಮಕ್ಕಳ‌ ಪಾಲಿಗಂತೂ ತಿಂಡಿ ರುಚಿ, ಪೋಷಕಾಂಶದ ಜೊತೆಗೆ ನೋಡಲು ಆಕರ್ಷಕವಾಗಿರಬೇಕು,ಮುಂಜಾನೆಯ ತಿಂಡಿಯನ್ನು (Breakfast) ಟೇಸ್ಟಿ ಮಾಡೋದರ ಜೊತೆಗೆ ನಾಲಿಗೆಗೆ ರುಚಿಯಾಗುವಂತೆ ಮಾಡೋ ಸವಾಲು ಕೂಡ ಅಮ್ಮಂದಿರ ಮೇಲಿದೆ.ಈ ರೆಸಿಪಿ ಅತ್ಯಂತ ಕಡಿಮೆ ಸಮಯದಲ್ಲಿ ರುಚಿಯಾಗಿ, ಪೋಷಕಾಂಶ‌ಭರಿತವಾಗಿ ಹಾಗೂ ನೋಡಲು ಆಕರ್ಷಕವಾಗಿ ಹಾಗೂ ನಾಲಿಗೆಯಲ್ಲಿ ನೀರೂರಿಸುವಂತೆ ಸಿದ್ಧವಾಗುತ್ತದೆ,ಮನೆಗಳಲ್ಲಿ ಮಕ್ಕಳು ತರಕಾರಿ ಅಂದ್ರೆ ದೂರ ಓಡಿ ಹೋಗುತ್ತಾರೆ. ಕೆಲ ಮಕ್ಕಳಂತೂ ಊಟದಲ್ಲಿ ತರಕಾರಿ ತೆಗೆದು ಊಟ ಮಾಡುತ್ತಾರೆ. ಹಾಗಾಗಿ ತರಕಾರಿ ಬೇಡ ಅಂತ ಹೇಳುವ ಮಕ್ಕಳು, ಬಾಯಿಗೆ ರುಚಿ ಇಲ್ಲ ಎಂದು ಗೊಣಗುವ ವೃದ್ಧರಿಗೆ ಇಷ್ಟವಾಗುವಂತಹ ಪೌಷ್ಠಿಕಾಂಶನಿಂದ ಕೂಡಿದ ತಾಲಿಪಟ್ಟು ಮಾಡಿ. ಇದು ಆರೋಗ್ಯ ಮತ್ತು ರುಚಿಕರವಾಗಿರುತ್ತದೆ.ಜೊತೆಗೆ ತರಕಾರಿ ತಿನ್ನಲು ಇಷ್ಟಪಡದ ಮಕ್ಕಳಿಗೆ ತರಕಾರಿಯನ್ನು ತಿನ್ನಿಸಬಹುದು.ಬೆಳಿಗ್ಗಿನ ತಿಂಡಿಗೆ ದಿನಾ ಇಡ್ಲಿ, ದೋಸೆ, ಉಪ್ಪಿಟ್ಟು ತಿಂದು ಬೇಜಾರಾದವರು ಒಮ್ಮೆ ರುಚಿಕರವಾದ ಹಿಟ್ಟು,ತರಕಾರಿ ಮಿಶ್ರಿತ ತಾಲಿಪಟ್ಟು ಮಾಡಿ ಸವಿಯಿರಿ. ಮಾಡುವುದಕ್ಕೂ ಅಷ್ಟೇನೂ ಕಷ್ಟವಿಲ್ಲ. ಜತೆಗೆ ತಿನ್ನುವುದಕ್ಕೆ ರುಚಿಕರ ಹಾಗೂ ಆರೋಗ್ಯಕರವಾಗಿರುತ್ತದೆ. ಅಂತಹ ಈಸಿ ಹಾಗೂ ಹೆಲ್ದಿ ರೆಸಿಪಿ(Healthy recipe) ಇಲ್ಲಿದೆ ನೋಡಿ..

ಮಿಶ್ರಸೊಪ್ಪಿನ ತಾಲಿಪಟ್ಟು ಮಾಡಲು ಬೇಕಾಗುವ ಸಾಮಾಗ್ರಿಗಳು

ಅಕ್ಕಿಹಿಟ್ಟು – 2 ಬೌಲ್/ 1/2 ಕಪ್ ಗೋಧಿ ಹಿಟ್ಟು , 1/2 ಕಪ್ ಕಡಲೇ ಹಿಟ್ಟು, 1/2 ಕಪ್ ರಾಗಿ ಹಿಟ್ಟು

ಚಿಕ್ಕದಾಗಿ ಹೆಚ್ಚಿದ ಈರುಳ್ಳಿ – 1 ಸಣ್ಣ ಬೌಲ್

ತುರಿದ ಸೌತೆಕಾಯಿ – 1 ಸಣ್ಣ ಬೌಲ್

ತುರಿದ ಕ್ಯಾರೆಟ್ – 1 ಸಣ್ಣ ಬೌಲ್

ತೆಂಗಿನತುರಿ – 4-5 ಸ್ಪೂನ್

ಪಾಲಾಕ್ ಸೊಪ್ಪು 1 ಕಪ್ ಸಣ್ಣಗೆ ಹಚ್ಚಿಟ್ಟುಕೊಂಡಿದ್ದು,

ಮೆಂತೆ ಸೊಪ್ಪು 1 ಕಪ್ ಸಣ್ಣಗೆ ಹಚ್ಚಿಟ್ಟುಕೊಂಡಿದ್ದು,

ಕೊತ್ತಂಬರಿ ಸೊಪ್ಪು-1/4 ಕಪ್,

ಹಸಿಮೆಣಸಿನಕಾಯಿ+ ಶುಂಠಿ ಪೇಸ್ಟ್ – 2 ಸ್ಪೂನ್

ಉಪ್ಪು – ರುಚಿಗೆ ತಕ್ಕಷ್ಟು

ಎಣ್ಣೆ – ಅಗತ್ಯಕ್ಕೆ ತಕ್ಕಷ್ಟು

ಮಿಶ್ರಸೊಪ್ಪಿನ ತಾಲಿಪಟ್ಟು ಮಾಡುವ ವಿಧಾನ:

ಅಕ್ಕಿಹಿಟ್ಟಿಗೆ ಈರುಳ್ಳಿ,ಗೋಧಿ ಹಿಟ್ಟು ಕಡಲೇ ಹಿಟ್ಟು ರಾಗಿ ಹಿಟ್ಟು ಸವತೆಕಾಯಿ,ಕ್ಯಾರೇಟ್,ಉಪ್ಪು,ಹಸಿಮೆಣಸು+ಶುಂಠಿ ಪೇಸ್ಟ್ ,ತೆಂಗಿನತುರಿ,ಪಾಲಾಕ್ ಸೊಪ್ಪು,ಮೆಂತೆ ಸೊಪ್ಪು, ಕೊತ್ತಂಬರಿ ಸೊಪ್ಪು ಹಸಿಮೆಣಸಿನಕಾಯಿ+ ಶುಂಠಿ ಪೇಸ್ಟ್ಹಾಕಿ ಚೆನ್ನಾಗಿ ಕಲೆಸಿ.‌ಜಾಸ್ತಿ‌ನೀರು ಬೆರೆಸುವುದು ಬೇಡ. ಈರುಳ್ಳಿ ಮತ್ತು ಸವತೆಕಾಯಿಯಲ್ಲಿರೋ ನೀರಿನಂಶ ಹಿಟ್ಟಿನ ಜೊತೆ ಬೆರೆತುಕೊಳ್ಳುವುದರಿಂದ ಹಿಟ್ಟು ಮೃದುವಾಗುತ್ತದೆ.ಬಳಿಕ ಲಿಂಬೆ ಗಾತ್ರದ ಉಂಡೆ ಮಾಡಿಕೊಂಡು ಇದನ್ನು ಬಾಳೆ ಎಲೆ ಅಥವಾ ರೊಟ್ಟಿ ತಟ್ಟುವ ಪ್ಲಾಸ್ಟಿಕ್ ಹಾಳೆಯ ಮೇಲೆ ತೆಳ್ಳಗೆ ತಟ್ಟಿ ಸಣ್ಣ ಉರಿಯಲ್ಲಿ ಬೇಯಿಸಿಕೊಳ್ಳಬೇಕು.ಈ ವೇಳೆ ಎಣ್ಣೆ ಅಥವಾ ತುಪ್ಪ ಹಚ್ಚಿದ್ರೆ ತಾಲಿಪಟ್ಟು ಮತ್ತಷ್ಟು ಗರಿ ಗರಿ ಆಗಿರುತ್ತದೆ ಈಗ ಹಿಟ್ಟು,ತರಕಾರಿ ಮಿಶ್ರಿತ ತಾಲಿಪಟ್ಟು ಸಿದ್ಧವಾಗುತ್ತದೆ. ಮೊಸರು ಅಥವಾ ಕಾಯಿ ಚಟ್ನಿ ಜೊತೆ ಸವಿದರೆ ತಾಲಿಪಟ್ಟಿನ ರುಚಿ ಹೆಚ್ಚಾಗುತ್ತದೆ.