ಬೆಂಗಳೂರು: ನಗರದಲ್ಲಿ ಎಲ್ಲೆಂದರಲ್ಲಿ ಕಸ ಎಸೆಯುತ್ತಿದ್ದವರನ್ನು ತಡೆದು ಸ್ವಚ್ಛತಾ ಕಾರ್ಯವನ್ನು ಮತ್ತಷ್ಟು ಸುಧಾರಿಸಲು ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರ ಹೊಸ ನಿಯಮವನ್ನು ಪರಿಚಯಿಸಿದ್ದು, ಕಸ ಎಸೆದವರ ಮನೆಗೆ ವಾಪಸ್‌ ಕಸ ತಂದು ಸುರಿಯಲಾಗುತ್ತಿದೆ.
ಹೀಗಿದ್ದರೂ ಸಹ ಎಚ್ಚೆತ್ತುಕೊಳ್ಳದ ಕೆಲ ಕಿಡಿಗೇಡಿಗಳು ತಮ್ಮ ನೀಚ ಬುದ್ದಿಯನ್ನು ಮುಂದುವರಿಸಿದ್ದು, ಎಲ್ಲೆಂದರಲ್ಲಿ ಕಸ ಬಿಸಾಡಿ ಉದ್ಧಟತನ ಪ್ರದರ್ಶಿಸುತ್ತಿದ್ದಾರೆ.
ಅದರಂತೆ ನಗರದ ಮೈಕೋ ಲೇಔಟ್‌ನ ಯುವತಿಯೊಬ್ಬಳು ತನ್ನ ಸ್ನೇಹಿತರ ಜತೆಗೂಡಿ ರಾಶಿ ರಾಶಿ ಕಸ ತಂದು ರಸ್ತೆ ಬದಿಗೆ ಹಾಕಿದ್ದಾಳೆ. ಇನ್ನು ಆ ಜಾಗದಲ್ಲಿ ಹೆಚ್ಚಾಗಿ ಕಸ ಸುರಿಯುತ್ತಿದ್ದ ಕಾರಣ ಸ್ಥಳೀಯರು ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರದ ಜತೆ ಕೈಜೋಡಿಸಿ ಸಿಸಿಟಿವಿ ಅಳವಡಿಸಿದ್ದರು. ಈ ಸಿಸಿಟಿವಿಯಲ್ಲಿ ಯುವತಿಯ ಹುಚ್ಚಾಟ ಸೆರೆಯಾಗಿದ್ದು, ಕಸ ಎಸೆದ ಬಳಿಕ ರಸ್ತೆಯಲ್ಲಿಯೇ ಸ್ಟೆಪ್‌ ಹಾಕಿದ್ದಾಳೆ.
ಈ ವಿಡಿಯೊ ವೀಕ್ಷಿಸಿದ ಮಾರ್ಷಲ್ಸ್‌ ಯುವತಿಯನ್ನು ಪತ್ತೆಹಚ್ಚಿ ಆಕೆಯ ಕೈಗೆ ದಂಡದ ರಸೀದಿ ನೀಡಿದ್ದಾರೆ. ಆಕೆಗೆ 1 ಸಾವಿರ ದಂಡ ವಿಧಿಸಿದ್ದಾರೆ. ಹೀಗೆ ಇರಲಾರದೇ ಕಸ ಹಾಕಿ ಡಾನ್ಸ್‌ ಮಾಡಿದ ಯುವತಿ ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಬೇಡವಾದ ರೀತಿ ಫೇಮಸ್‌ ಆಗುತ್ತಿದ್ದಾಳೆ. ಇದು ಜಿಬಿಎ ಮಾಡಿರುವ ನಿಯಮವನ್ನು ಗಂಭೀರವಾಗಿ ತೆಗೆದುಕೊಳ್ಳದ ಜನರಿಗೆ ಪಾಠವಾಗಿದೆ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.