ಮತ್ತೊಬ್ಬ ಅಧ್ಯಕ್ಷನನ್ನು ದೇಶಬಿಡಿಸಿದ GenZಗಳು!

ನೇಪಾಳದಲ್ಲಿನ GenZಗಳ ಹೋರಾಟ, ಬಳಿಕ ನಡೆದ ರಾಜಕೀಯ ಬೆಳವಣಿಗೆಗಳು ಇನ್ನೂ ನೆನಪಿನಲ್ಲಿವೆ. ಈ ಹೊತ್ತಿನಲ್ಲಿಯೇ ಮತ್ತೊಬ್ಬ ಅಧ್ಯಕ್ಷನನ್ನು GenZಗಳು ದೇಶ ಬಿಡಿಸಿದ್ದಾರೆ.

ಮಡಗಾಸ್ಕರ್ ಅಧ್ಯಕ್ಷ ಆಂಡ್ರಿ ರಾಜೋಲಿನಾ ತಮ್ಮ ಸ್ಥಾನ ತೊರೆಯುವಂತೆ ಹಲವು ವಾರಗಳ ಕಾಲ ನಡೆದ ಪ್ರತಿಭಟನೆ, ಹತ್ಯೆ ಯತ್ನದ ಬಳಿಕ ಸುರಕ್ಷಿತ ಸ್ಥಳದಲ್ಲಿ ಆಶ್ರಯ ಪಡೆದಿದ್ದೇನೆ ಎಂದು ಹೇಳಿದ್ದಾರೆ.

51 ವರ್ಷದ ಫೇಸ್‌ಬುಕ್ ಲೈವ್ ಮೂಲಕ ದೇಶವನ್ನು ಉದ್ದೇಶಿಸಿ ಮಾತನಾಡಿದರು, ಸೇನೆಯ ಒಂದು ಗುಂಪು ಮತ್ತು ರಾಜಕಾರಣಿಗಳು ನನ್ನನ್ನು ಹತ್ಯೆ ಮಾಡಲು ಯೋಜನೆ ರೂಪಿಸಿದ್ದಾರೆ ಎಂದು ಆರೋಪಿಸಿದ್ದಾರೆ.

ಆದರೆ ಆಂಡ್ರಿ ರಾಜೋಲಿನಾ ಯಾವ ಸ್ಥಳದಲ್ಲಿದ್ದಾರೆ? ಎಂಬ ಕುರಿತು ಯಾವುದೇ ಸುಳಿವು ನೀಡಿಲ್ಲ. ಆದರೆ ಮಾಹಿತಿಗಳ ಪ್ರಕಾರ ಫ್ರೆಂಚ್‌ ಮಿಲಿಟರಿ ವಿಮಾನದ ಮೂಲಕ ದೇಶ ಬಿಟ್ಟು ಪರಾರಿಯಾಗಿದ್ದಾರೆ. ಕಳೆದ 15 ದಿನಗಳಿಂದ ದೇಶದ ಯುವಕರು ಆಂಡ್ರಿ ರಾಜೋಲಿನಾ ಅವರನ್ನು ಅಧಿಕಾರದಿಂದ ಕೆಳಗಿಳಿಸಬೇಕು ಎಂದು ಬೃಹತ್ ಪ್ರತಿಭಟನೆ ಕೈಗೊಂಡಿದ್ದರು.

ಯುವ ಪ್ರತಿಭಟನಾಕಾರರನ್ನು ‘ಜನರಲ್ ಝಡ್ ಮಾಡಾ’ ಎಂದು ಕರೆಯಲ್ಪಡುವ ಯುವ ಪ್ರತಿಭಟನಾಕಾರರನ್ನು ಸಮಾಧಾನಪಡಿಸಲು ಆಂಡ್ರಿ ರಾಜೋಲಿನಾ ನಡೆಸಿದ ಎಲ್ಲಾ ಪ್ರಯತ್ನಗಳು ವಿಫಲವಾಗಿದ್ದವು. ಅಧ್ಯಕ್ಷರು ತಮ್ಮ ಸಂಪೂರ್ಣ ಸರ್ಕಾರವನ್ನು ವಜಾಗೊಳಿಸಿ ಇತರ ರಿಯಾಯಿತಿಗಳನ್ನು ನೀಡಿದರು, ಆದರೆ ಪ್ರತಿಭಟನೆಗಳು ಕೊನೆಯಾಗಲಿಲ್ಲ.

ಕಳೆದ ಬುಧವಾರದ ಬಳಿಕ ಆಂಡ್ರಿ ರಾಜೋಲಿನಾ ಬಹಿರಂಗವಾಗಿ ಕಾಣಿಸಿಕೊಳ್ಳಲಿಲ್ಲ ಮತ್ತು ವಾರಾಂತ್ಯದಲ್ಲಿ ಅವರನ್ನು ಅಧಿಕಾರದಿಂದ ಬಲವಂತವಾಗಿ ಕೆಳಗಿಳಿಸುವ ಪ್ರಯತ್ನ ನಡೆಯುತ್ತಿದೆ ಎಂದು ಅವರ ಕಚೇರಿ ತಿಳಿಸಿತ್ತು.

ಪ್ರತಿಭಟನೆ ತೀವ್ರಗೊಂಡು ಸೇನೆ ಹಿಂದೂ ಮಹಾಸಾಗರದ ದ್ವೀಪದಲ್ಲಿರುವ ರಾಜ್ಯ ಟಿವಿ ಪ್ರಧಾನ ಕಚೇರಿಯನ್ನು ವಶಪಡಿಸಿಕೊಳ್ಳುವುದಾಗಿ ಬೆದರಿಕೆ ಹಾಕಿದ್ದರಿಂದ, ಅವರ ಸೋಮವಾರದ ರಾಷ್ಟ್ರವನ್ನು ಉದ್ದೇಶಿಸಿ ಭಾಷಣ ಹಲವಾರು ಬಾರಿ ವಿಳಂಬವಾಗಿತ್ತು.

ಆಂಡ್ರಿ ರಾಜೋಲಿನಾ ಫೇಸ್‌ಬುಕ್ ಲೈವ್‌ನಲ್ಲಿ, “ಸೆಪ್ಟೆಂಬರ್ 25 ರಿಂದ, ನನ್ನ ಮೇಲೆ ಹತ್ಯೆ ಪ್ರಯತ್ನಗಳು ಮತ್ತು ದಂಗೆ ಪ್ರಯತ್ನಗಳು ನಡೆದಿವೆ. ಮಿಲಿಟರಿ ಸಿಬ್ಬಂದಿ ಮತ್ತು ರಾಜಕಾರಣಿಗಳ ಗುಂಪು ನನ್ನನ್ನು ಹತ್ಯೆ ಮಾಡಲು ಯೋಜಿಸಿದೆ. ನನ್ನ ಜೀವವನ್ನು ರಕ್ಷಿಸಿಕೊಳ್ಳಲು ನಾನು ಸುರಕ್ಷಿತ ಸ್ಥಳವನ್ನು ಹುಡುಕಬೇಕಾಯಿತು. ಈ ಸಮಸ್ಯೆಗಳನ್ನು ಪರಿಹರಿಸಲು ಒಂದೇ ಒಂದು ಮಾರ್ಗವಿದೆ, ದೇಶದಲ್ಲಿ ಜಾರಿಯಲ್ಲಿರುವ ಸಂವಿಧಾನವನ್ನು ಗೌರವಿಸುವುದು” ಎಂದು ಹೇಳಿದ್ದಾರೆ.

ಆಂಡ್ರಿ ರಾಜೋಲಿನಾರನ್ನು 2009ರಲ್ಲಿ ಅಧಿಕಾರಕ್ಕೆ ತರಲು ಸಹಾಯ ಮಾಡಿದ್ದ ಪ್ರಬಲವಾದ ಸೇನಾ ಘಟಕ CAPSAT ವಾರಾಂತ್ಯದಲ್ಲಿ ಎಲ್ಲಾ ಸಶಸ್ತ್ರ ಪಡೆಗಳಿಗೂ ತಾನೇ ಮುಖ್ಯಸ್ಥ ಎಂದು ಘೋಷಣೆ ಮಾಡಿತು. ಕೆಲವು ಅಧಿಕಾರಿಗಳು ರಾಜಧಾನಿ ಅಂಟಾನನರಿವೊದ ಬೀದಿಗಳಲ್ಲಿ ಪ್ರತಿಭಟನಾಕಾರರೊಂದಿಗೆ ಸೇರಿಕೊಂಡರು.

ಸೋಮವಾರ ಮಿಲಿಟರಿ ಕಮಾಂಡರ್‌ಗಳ ಸಭೆಯ ಬಳಿಕ, CAPSAT ನಿಂದ ಸೂಚಿಸಲಾದ ಜನರಲ್ ಡೆಮೋಸ್ತನ ಪಿಕುಲಾಸ್ ಹೊಸ ಸೇನಾ ಮುಖ್ಯಸ್ಥರಾದರು. ದ್ವೀಪ ರಾಷ್ಟ್ರದಲ್ ಕಾನೂನು ಸುವ್ಯವಸ್ಥೆಯನ್ನು ಕಾಪಾಡಿಕೊಳ್ಳಲು ಭದ್ರತಾ ಪಡೆಗಳು ಒಟ್ಟಾಗಿ ಕೆಲಸ ಮಾಡುತ್ತಿವೆ ಎಂದು ಭರವಸೆ ಕೊಟ್ಟರು.

ಸಂಜೆಯ ಹೊತ್ತಿಗೆ ಬಿಕ್ಕಟ್ಟನ್ನು ಪರಿಹರಿಸಲು ಪ್ರಯತ್ನಿಸಲಾಗುತ್ತಿದೆ ಎಂದು ರಾಜ್ಯ ಟಿವಿ ಪ್ರಧಾನ ಕಚೇರಿಯಲ್ಲಿ ಜನರಲ್ ಹೇಳಿದರು. ಆದರೆ ಹೆಸರು ಬಹಿರಂಗಪಡಿಸದ ಮಡಗಾಸ್ಕರ್‌ನ ಅತಿದೊಡ್ಡ ವಿರೋಧ ಪಕ್ಷವಾದ TIM ನ ಹಿರಿಯ ನಾಯಕ ಬಿಬಿಸಿಗೆ ಮಡಗಾಸ್ಕರ್ ಅನ್ನು ಈಗ ಸೇನಾ ಘಟಕವು ಪರಿಣಾಮಕಾರಿಯಾಗಿ ನಡೆಸುತ್ತಿದೆ ಎಂದು ಹೇಳಿದ್ದಾರೆ.