ಮೊನ್ನೆಯಷ್ಟೇ ( ನವೆಂಬರ್‌ 15 ) ರಾಜಮೌಳಿ ಹಾಗೂ ಮಹೇಶ್‌ ಬಾಬು ಕಾಂಬಿನೇಷನ್‌ನ ಚಿತ್ರದ ಶೀರ್ಷಿಕೆ ಅನಾವರಣಗೊಂಡಿತು. ಆರಂಭದಲ್ಲಿ ಗ್ಲೋಬ್‌ಟ್ರಾಟರ್‌ ಎಂಬ ತಾತ್ಕಾಲಿಕ ಶೀರ್ಷಿಕೆಯನ್ನು ಇಟ್ಟಿದ್ದ ರಾಜಮೌಳಿ ಚಿತ್ರಕ್ಕೆ ವಾರಣಾಸಿ ಎಂಬ ಶೀರ್ಷಿಕೆಯನ್ನು ನಿಗದಿಪಡಿಸಿದ್ದು, ನಿನ್ನೆ ಮಹೇಶ್‌ ಬಾಬು ಫಸ್ಟ್‌ಲುಕ್‌ ಹಾಗೂ ಪಾತ್ರದ ಹೆಸರನ್ನು ಸಣ್ಣ ಟೀಸರ್‌ನೊಂದಿಗೆ ಘೋಷಿಸಲಾಯಿತು.
ಇನ್ನು ಈ ಕಾರ್ಯಕ್ರಮದಲ್ಲಿ ಟೀಸರ್‌ ಪ್ರಸಾರವಾಗುವಾಗ ತಾಂತ್ರಿಕ ತೊಂದರೆಗಳು ಸಂಭವಿಸಿ ತಡವಾಯಿತು. ಕೊನೆಗೂ ಟೀಸರ್‌ ಪ್ರಸಾರವಾಗುತ್ತಿದ್ದಂತೆ ಮಾತನಾಡಿದ ರಾಜಮೌಳಿ ತಮ್ಮ ತಂದೆ ಹನುಮಂತನ ಬಗ್ಗೆ ಹೇಳಿದ ಹೇಳಿಕೆಯನ್ನು ಉಲ್ಲೇಖಿಸಿ ಟೀಕಿಸಿದರು. ಹನುಮ ನಮ್ಮ ಬೆನ್ನ ಹಿಂದೆಯೇ ಇರುತ್ತಾನೆ ಹಾಗೂ ಎದೆ ತಟ್ಟಿ ಕಾಪಾಡುತ್ತಾನೆ ಎಂದಿದ್ದರು. ಇದೇನಾ ಕಾಪಾಡುವುದು? ಎಂದು ಟೀಸರ್‌ ಪ್ರಸಾರದಲ್ಲಿ ತೊಂದರೆಯಾಗಿದ್ದಕ್ಕೆ ಕಿಡಿಕಾರಿದರು ಹಾಗೂ ತನಗೆ ದೇವರ ಮೇಲೆ ದೊಡ್ಡ ನಂಬಿಕೆಯೇನೂ ಇಲ್ಲ ಎಂದರು.
ಇದರ ಬೆನ್ನಲ್ಲೇ ಸಾಮಾಜಿಕ ಜಾಲತಾಣದಲ್ಲಿ ರಾಜಮೌಳಿ ಓರ್ವ ನಾಸ್ತಿಕ ಎಂಬ ದೊಡ್ಡ ಚರ್ಚೆಗಳು ಆರಂಭವಾದವು. ನಿರೀಕ್ಷೆಯಂತೆ ಬಲಪಂಥೀಯರು ಹಾಗೂ ದೇವರ ಭಕ್ತರು ರಾಜಮೌಳಿ ವಿರುದ್ಧ ಕಿಡಿಕಾರಿ ಕ್ಷಮೆಯಾಚಿಸುವಂತೆ ಪಟ್ಟುಹಿಡಿದರು. ಇದರ ಜತೆಜತೆಗೆ ರಾಜಮೌಳಿ ಈ ಹಿಂದೆ ಮಾಡಿದ್ದ ಟ್ವೀಟ್‌ಗಳೂ ಸಹ ವೈರಲ್ ಆದವು.
ರಾಜಮೌಳಿ ಮನಸ್ಮೃತಿ ಪ್ರಕಾರ ಜಾತಿವ್ಯವಸ್ಥೆ ಹೇಗೆ ರೂಪುಗೊಂಡಿತ್ತು ಎಂಬುದರ ಕುರಿತು 2012ರಲ್ಲಿ ಬರೆದುಕೊಂಡಿದ್ದ ಟ್ವೀಟ್‌ ಸಹ ಈ ಸಮಯದಲ್ಲಿ ವೈರಲ್ ಆಗಿದೆ. ಮನುಸ್ಮೃತಿಯ ಪ್ರಕಾರ ಜಾತಿ ವ್ಯವಸ್ಥೆ ಹೇಗಿತ್ತು ಎಂದರೆ ಅದನ್ನು ನಮ್ಮ ಜೀವನಶೈಲಿ ಮೇಲೆ ಅಳೆಯಲಾಗುತ್ತಿತ್ತೇ ಹೊರತು ನಮ್ಮ ಹುಟ್ಟಿನಿಂದಲ್ಲ, ನನ್ನ ಜತೆ ಟೆನ್ನಿಸ್‌ ಆಡುತ್ತಿದ್ದ ಪ್ರಸಾದ್‌ ಎಂಬ ಜಂಟಲ್‌ಮ್ಯಾನ್‌ ಒಬ್ಬರು ಇದರ ಕುರಿತು ಇನ್ನೂ ಚೆನ್ನಾಗಿ ವಿವರಿಸಿದ್ದರು ಎಂದು ಬರೆದುಕೊಂಡಿದ್ದರು.
ಮೊದಲಿಗೆ ಪಂಚಮ ಜಾತಿ (ಅಸ್ಪೃಶ್ಯರು): ಜೀವನ ಸಾಗಿಸಲು ಇತರರ ಮೇಲೆ ಅವಲಂಬಿತರಾಗಿರುವವರು. ತನಗಾಗಿ ಹಾಗೂ ತನ್ನ ಕುಟುಂಬಕ್ಕಾಗಿ ಬಾಳುವವನು ಶೂದ್ರ. ತನಗಾಗಿ ಹಾಗೂ ತನ್ನ ಜತೆ ವ್ಯವಹಾರ ಮಾಡುವವರಿಗಾಗಿ ಲಾಭ ಮಾಡಿಕೊಳ್ಳುವವನು ವೈಶ್ಯ. ತನ್ನ ಕೆಳಗಿನವರು ತಿಂದ ಬಳಿಕ ತಾನು ತಿನ್ನುವವನು ಕ್ಷತ್ರಿಯ. ಮೊದಲು ತಾನು ಕಲಿತು ಬಳಿಕ ಇತರರಿಗೆ ಬೋಧನೆ ಮಾಡುವವನು ಬ್ರಾಹ್ಮಣ ಎಂದು ಬರೆದುಕೊಂಡಿದ್ದರು.
ಈ ಟ್ವೀಟ್‌ ವೈರಲ್ ಆಗಿದ್ದು, ಇದನ್ನು ಕಂಡ ಬಳಿಕ ರಾಜಮೌಳಿ ಓರ್ವ ನಾಸ್ತಿಕ ಎಂದು ಹೇಳುತ್ತಿದ್ದವರು ಈತ ಪೂರ್ಣ ಪ್ರಮಾಣದ ನಾಸ್ತಿಕನಲ್ಲ ಎಂದು ಕಾಲೆಳೆದರೆ, ಇನ್ನೂ ಕೆಲವರು ಈ ವಿವರಣೆಯಲ್ಲಿಯೂ ತಪ್ಪು ಹುಡುಕಲು ಆರಂಭಿಸಿದ್ದಾರೆ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.