ಕಳೆದ ಸೆಪ್ಟೆಂಬರ್‌ 22ರಂದು ಟಿ ಸೀರೀಸ್‌ ಯುಟ್ಯೂಬ್‌ ಚಾನೆಲ್‌ನಲ್ಲಿ ಮೋದಿಗಾಗಿ ಹಾಡೊಂದು ಬಿಡುಗಡೆಯಾಗಿತ್ತು. ಮೋದಿ ಮೋದಿ ಹೇ ತೋ ಮುಮ್ಕಿನ್‌ ಹೇ ಎಂದು ಆರಂಭವಾಗುವ ಈ ಹಾಡು ಭಕ್ತರ ಪಾಲಿಗೆ ಇಷ್ಟವಾಗಿತ್ತು ಹಾಗೂ ಭಾರೀ ಟೀಕೆಗೂ ಸಹ ಒಳಗಾಗಿತ್ತು. ಆರಂಭದಲ್ಲಿ ಭಾರೀ ಸದ್ದು ಮಾಡಿದ ಈ ಹಾಡನ್ನು ಹಿಂದುಳಿದ ಭಾರತದ ದೃಶ್ಯಗಳನ್ನು ಬಳಸಿ ಮೋದಿ ವಿರುದ್ಧ ಟ್ರೋಲ್‌ ಮಾಡಲು ಬಳಸಲಾಯಿತು.
ಮೋದಿಯವರ ದೃಷ್ಟಿಕೋನ, ಶ್ರದ್ಧೆ ಹಾಗೂ ನಾಯಕತ್ವವವನ್ನು ಸಂಭ್ರಮಿಸುವ ಸಲುವಾಗಿ ಈ ಹಾಡನ್ನು ಬಿಡುಗಡೆ ಮಾಡುತ್ತಿದ್ದೇವೆ ಎಂದು ಬರೆದುಕೊಂಡು ಈ ಹಾಡನ್ನು ಬಿಡುಗಡೆ ಮಾಡಲಾಗಿತ್ತು. ಮೀಟ್‌ ಬ್ರೋಸ್‌ ಸಂಗೀತದಡಿಯಲ್ಲಿ, ಮೀಟ್‌ ಬ್ರೋಸ್‌, ಆದರ್ಶ್‌ ಶುಕ್ಲಾ ಹಾಗೂ ದಿವ್ಯಾ ಭಟ್‌ ಕಂಠದಲ್ಲಿ ಮೂಡಿಬಂದಿದ್ದ ಈ ಹಾಡಿಗೆ ನದಾನ್‌ ಸಾಹಿತ್ಯ ಬರೆದಿದ್ದರು.
ಹೀಗೆ ತಯಾರಾದ ಹಾಡಿಗೆ ಮೋದಿ ಅಭಿಮಾನಿಗಳು ತಲೆದೂಗಿದ್ದು ಹಾಡು ಇಷ್ಟವಾದ ಕಾರಣ ಲೈಕ್ ಮಾಡಿದ್ದಾರೆ. ಆದರೆ ಈ ವಿಡಿಯೊಗೆ ಲೈಕ್‌ಗಿಂತ ಹೆಚ್ಚು ಡಿಸ್ಲೈಕ್ ಬಂದಿವೆ. ಹೌದು, ಯುಟ್ಯೂಬ್‌ನಲ್ಲಿ ವಿಡಿಯೊ ಇಷ್ಟವಾಗದಿದ್ದರೆ ಅದನ್ನು ಡಿಸ್ಲೈಕ್ ಮಾಡಲು ಆಯ್ಕೆಯನ್ನು ನೀಡಲಾಗಿದೆ. ಆದರೆ ಲೈಕ್ಸ್‌ಗಳನ್ನು ತೋರುವ ಹಾಗೆ ಡಿಸ್‌ಲೈಕ್‌ಗಳನ್ನು ತೋರದ ಯುಟ್ಯೂಬ್‌ ಅದನ್ನು ಮುಚ್ಚಿಟ್ಟಿದೆ.
ಆದರೆ ಬಳಕೆದಾರರು ಯುಟ್ಯೂಬ್‌ ವಿಡಿಯೊವೊಂದಕ್ಕೆ ಎಷ್ಟು ಡಿಸ್ಲೈಕ್ ಬಂದಿವೆ ಎಂಬುದನ್ನು ತಿಳಿದುಕೊಳ್ಳಲು ಸಾಕಷ್ಟು ವೆಬ್‌ಸೈಟ್‌ಗಳಿದ್ದು, ಯಾವ ವಿಡಿಯೊನ ಡಿಸ್ಲೈಕ್ ಬಗ್ಗೆ ಮಾಹಿತಿ ಬೇಕೋ ಆ ವಿಡಿಯೊನ ಲಿಂಕನ್ನು ಯುಟ್ಯೂಬ್‌ ಡಿಸ್ಲೈಕ್ ವ್ಯೂವರ್‌ ವೆಬ್‌ಸೈಟ್‌ನಲ್ಲಿ ಹಾಕಿ ಚೆಕ್‌ ಮಾಡಬಹುದು.
ಹೀಗೆ ಮೋದಿ ಮೋದಿ ಹಾಡಿನ ಡಿಸ್ಲೈಕ್ ಎಷ್ಟಿದೆ ಎಂದು ಹಾಡು ವೈರಲ್ ಆದಾಗಿನಿಂದಲೂ ನೆಟ್ಟಿಗರು ಚೆಕ್‌ ಮಾಡುತ್ತಲೇ ಬಂದಿದ್ದು, ದಿನದಿಂದ ದಿನಕ್ಕೆ ಡಿಸ್ಲೈಕ್ ಸಂಖ್ಯೆ ಹೆಚ್ಚುತ್ತಲೇ ಇದೆ. ಅಕ್ಟೋಬರ್ 25ರ ಸಮಯಕ್ಕೆ ಈ ಹಾಡಿಗೆ 56 ಸಾವಿರ ಲೈಕ್‌ಗಳು ಬಂದಿದ್ದು, 4 ಲಕ್ಷಕ್ಕೂ ಅಧಿಕ ಡಿಸ್ಲೈಕ್ ಬಂದಿವೆ. ಹೀಗೆ 400K ಡಿಸ್ಲೈಕ್ ಪಡೆದುಕೊಂಡಿರುವ ಮೋದಿ ಹಾಡಿಗೆ ʼಆಪ್‌ ಕಿ ಬಾರ್‌ ಚಾರ್‌ ಸೌ ಪಾರ್ʼ ಎಂದು ನೆಟ್ಟಿಗರು ಕಿಡಿಕಾರಿದ್ದಾರೆ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.