ದೇಹದಲ್ಲಿನ ಈ ಬದಲಾವಣೆಗಳು ಕ್ಯಾನ್ಸರ್​ ಲಕ್ಷಣವಂತೆ;ಕಾಮನ್’ ಎಂದು ನಿರ್ಲಕ್ಷಿಸಿದರೆ ಅಪಾಯ ಕಟ್ಟಿಟ್ಟ ಬುತ್ತಿ!

ಮನುಷ್ಯನನ್ನು ಬಾಧಿಸುವ ಮಾರಣಾಂತಿಕ ಕಾಯಿಲೆಗಳ ಪೈಕಿ ಕ್ಯಾನ್ಸರ್ ಅತ್ಯಂತ ಭೀಕರವಾಗಿದೆ. ಇದು ಹಂತ ಹಂತವಾಗಿ ವ್ಯಕ್ತಿಯನ್ನು ದೈಹಿಕವಾಗಿ ಮಾತ್ರವಲ್ಲದೆ ಮಾನಸಿಕವಾಗಿಯೂ ಸಾಕಷ್ಟು ನರಳಾಟಕ್ಕೆ ದೂಡುತ್ತದೆ. ಕ್ಯಾನ್ಸರ್‌ ಎಂಬ ಪದ ಕೇಳಿದೊಡನೆಯೇ ಸಾವು ಖಚಿತ ಎಂಬ ಆಲೋಚನೆ ನಮ್ಮ ಮನಸ್ಸನ್ನು ಆವರಿಸುತ್ತದೆ. ಆದರೆ, ಸತ್ಯವೇನೆಂದರೆ, ಈ ಕಾಯಿಲೆಯ ಆರಂಭಿಕ ಲಕ್ಷಣಗಳನ್ನು ಗುರುತಿಸಿದರೆ, ಇದನ್ನು ನಿವಾರಿಸಿ ಜೀವ ಉಳಿಸಬಹುದು.

ನಮ್ಮ ದೇಹದಲ್ಲಿ ಸಣ್ಣ ಸಮಸ್ಯೆಗಳು ಪ್ರಾರಂಭವಾದಾಗ, ಅದು ರೋಗಲಕ್ಷಣಗಳ ಮೂಲಕ ನಮಗೆ ನಿಧಾನವಾಗಿ ಸೂಚನೆಗಳನ್ನು ನೀಡುತ್ತದೆ. ಉದಾಹರಣೆಗೆ, ಹಿಮೋಗ್ಲೋಬಿನ್ ಕಡಿಮೆಯಾದರೆ ಸುಸ್ತು, ರಕ್ತದೊತ್ತಡ ಏರುಪೇರಾದರೆ ಹೃದಯ ಸಮಸ್ಯೆಗಳು ಗೋಚರಿಸುತ್ತವೆ.

ಅದೇ ರೀತಿ, ಮಾರಣಾಂತಿಕ ಕ್ಯಾನ್ಸರ್ ಕೂಡ ದೇಹದಲ್ಲಿ ಆಗುವ ಕೆಲವು ನಿರ್ದಿಷ್ಟ ಬದಲಾವಣೆಗಳ ಮೂಲಕ ಮುನ್ಸೂಚನೆಗಳನ್ನು ನೀಡುತ್ತದೆ. ವೈದ್ಯಕೀಯ ಪರೀಕ್ಷೆಗಳು ಅಗತ್ಯವಾದರೂ, ನಮ್ಮ ದೇಹ ನೀಡುವ ಈ ಆರಂಭಿಕ ಸೂಚನೆಗಳನ್ನು ನಿರ್ಲಕ್ಷಿಸದೆ ಹೆಚ್ಚು ಗಮನಹರಿಸಿದರೆ, ಸರಿಯಾದ ಸಮಯದಲ್ಲಿ ಚಿಕಿತ್ಸೆ ಆರಂಭಿಸಿ ದೊಡ್ಡ ಗಂಡಾಂತರದಿಂದ ಪಾರಾಗಬಹುದು.ಹಾಗಾದ್ರೆ ಕ್ಯಾನ್ಸರ್‌ನ ಆರಂಭಿಕ ಲಕ್ಷಣಗಳ (Cancer Symptoms) ಬಗ್ಗೆ ತಿಳಿದುಕೊಳ್ಳೋಣ ಬನ್ನಿ.

ತೂಕ ಇಳಿಕೆ:

ಕೇವಲ ಐದು ಕಿಲೋಗ್ರಾಂ ಅಥವಾ ಅದಕ್ಕಿಂತ ಹೆಚ್ಚು ದೇಹದ ತೂಕವು ಇದ್ದಕ್ಕಿದ್ದಂತೆ, ಯಾವುದೇ ಸ್ಪಷ್ಟ ಕಾರಣವಿಲ್ಲದೆ, ಇಳಿಕೆಯಾಗುತ್ತಿದ್ದರೆ, ಇದು ಕ್ಯಾನ್ಸರ್‌ನ ಪ್ರಥಮ ಅಥವಾ ಆರಂಭಿಕ ಲಕ್ಷಣವಾಗಿರಬಹುದು ಎಂದು ವೈದ್ಯರು ಹೇಳುತ್ತಾರೆ.

ಈ ಲಕ್ಷಣವು ಸಾಮಾನ್ಯವಾಗಿ ಮೇದೋಜ್ಜೀರಕ ಗ್ರಂಥಿಯ (Pancreatic) ಕ್ಯಾನ್ಸರ್, ಹೊಟ್ಟೆಯ ಕ್ಯಾನ್ಸರ್, ಶ್ವಾಸಕೋಶದ ಕ್ಯಾನ್ಸರ್ ಅಥವಾ ಅನ್ನನಾಳದ ಕ್ಯಾನ್ಸರ್‌ನಂತಹ ಕಾಯಿಲೆಗಳಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ.

ಹೀಗೆ ಕಾರಣವಿಲ್ಲದೆ ದೇಹದ ತೂಕ ದಿನದಿಂದ ದಿನಕ್ಕೆ ಕಡಿಮೆ ಆಗುತ್ತಾ ಬರುವುದು, ಆಂತರಿಕವಾಗಿ ಗಂಭೀರ ಸಮಸ್ಯೆ ಇದೆ ಎಂಬುದರ ಸ್ಪಷ್ಟ ಸೂಚನೆಯಾಗಿದೆ. ಇಂತಹ ಬದಲಾವಣೆ ಕಂಡುಬಂದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸುವುದು ಅತ್ಯಗತ್ಯ.

ಅತಿಯಾದ ಕೆಮ್ಮು

ಸಾಮಾನ್ಯವಾಗಿ ಕೆಮ್ಮು ವಾತಾವರಣದ ಬದಲಾವಣೆ ಅಥವಾ ವೈರಲ್ ಸೋಂಕಿನಿಂದ ಬರುತ್ತದೆ ಮತ್ತು ಔಷಧಿ ತೆಗೆದುಕೊಂಡರೆ ಗುಣವಾಗುತ್ತದೆ. ಆದರೆ, ಈ ಕೆಳಗಿನ ಲಕ್ಷಣಗಳು ಕಂಡುಬಂದರೆ ತಕ್ಷಣ ಎಚ್ಚೆತ್ತುಕೊಳ್ಳಬೇಕು:

ನಿರಂತರ ಕೆಮ್ಮು: ಬ್ರಾಂಕೈಟಿಸ್‌ನಂತೆ ಕಾಣುವ ನಿರಂತರ, ಎಡೆಬಿಡದ ಕೆಮ್ಮು.

ರಕ್ತದಂಶ: ಕೆಮ್ಮಿದಾಗ ಕಫದೊಂದಿಗೆ ರಕ್ತ ಬರುತ್ತಿದ್ದರೆ, ಅದನ್ನು ಶ್ವಾಸಕೋಶದ ಕ್ಯಾನ್ಸರ್‌ನ ಗಂಭೀರ ಲಕ್ಷಣವೆಂದು ಗುರುತಿಸಬಹುದು.

ದೇಹದ ನೋವು: ಶ್ವಾಸಕೋಶದ ಕ್ಯಾನ್ಸರ್‌ನಿಂದ ಬಳಲುವ ಕೆಲವರಲ್ಲಿ ಎದೆ ನೋವು ಕಾಣಿಸಿಕೊಳ್ಳುವುದಲ್ಲದೆ, ಈ ನೋವು ತೋಳುಗಳ ಕೆಳಗೆ ಮತ್ತು ಭುಜದವರೆಗೆ ವಿಸ್ತರಿಸುವುದನ್ನು ವರದಿ ಮಾಡಿದ್ದಾರೆ.

ಈ ಅತಿಯಾದ ಕೆಮ್ಮು, ಕಫದಲ್ಲಿ ರಕ್ತದಂಶ, ಎದೆ ಮತ್ತು ತೋಳುಗಳ ನೋವು ದೀರ್ಘಕಾಲ ಕಾಡಿದರೆ, ಇವು ಶ್ವಾಸಕೋಶದ ಗೆಡ್ಡೆಗಳು ಅಥವಾ ರಕ್ತಕ್ಯಾನ್ಸರ್‌ನ (Leukemia)ಂತಹ ಮಾರಣಾಂತಿಕ ಕಾಯಿಲೆಗಳ ಮುನ್ಸೂಚನೆಯಾಗಿರಬಹುದು. ಸಾಮಾನ್ಯವಾಗಿ ಧೂಮಪಾನ ಮತ್ತು ಮದ್ಯಪಾನ ಮಾಡುವವರಿಗೆ ಈ ಅಪಾಯ ಹೆಚ್ಚು.

ಪದೇ-ಪದೇ ಜ್ವರ

ಸಾಮಾನ್ಯವಾಗಿ ಜ್ವರವು ದೇಹವು ಸೋಂಕಿನ ವಿರುದ್ಧ ಯಶಸ್ವಿಯಾಗಿ ಹೋರಾಡುತ್ತಿದೆ ಎಂಬುದರ ಸಂಕೇತವಾಗಿರುತ್ತದೆ. ಆದರೆ, ಯಾವುದೇ ಸ್ಪಷ್ಟ ಕಾರಣವಿಲ್ಲದಿದ್ದರೂ ಪದೇ-ಪದೇ ಜ್ವರ ಮರುಕಳಿಸುತ್ತಿದ್ದರೆ ಅಥವಾ ನಿರಂತರವಾಗಿ ಸೋಂಕುಗಳು ಉಂಟಾಗುತ್ತಿದ್ದರೆ, ಅದು ಗಂಭೀರ ಕಳವಳಕ್ಕೆ ಕಾರಣವಾಗಬಹುದು.

ಕೆಲವು ರೀತಿಯ ಕ್ಯಾನ್ಸರ್‌ನಿಂದ, ವಿಶೇಷವಾಗಿ ಲ್ಯುಕೇಮಿಯಾ (ರಕ್ತದ ಕ್ಯಾನ್ಸರ್) ದಿಂದ, ದೇಹದ ರೋಗನಿರೋಧಕ ವ್ಯವಸ್ಥೆಯ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತದೆ.

ರೋಗನಿರೋಧಕ ಶಕ್ತಿಯು ಕುಗ್ಗಿದಾಗ, ದೇಹವು ಸಣ್ಣ ಸೋಂಕುಗಳ ವಿರುದ್ಧವೂ ಪರಿಣಾಮಕಾರಿಯಾಗಿ ಹೋರಾಡಲು ಸಾಧ್ಯವಾಗುವುದಿಲ್ಲ. ಇದರಿಂದ ಪದೇ-ಪದೇ ಜ್ವರ ಅಥವಾ ಸೋಂಕುಗಳು ಮರುಕಳಿಸುತ್ತಾ ಹೋಗುತ್ತವೆ.

ಉಗುರುಗಳಲ್ಲಿನ ಬದಲಾವಣೆಗಳು

ಬೆರಳಿನ ಉಗುರುಗಳಲ್ಲಿ ಕಾಣಿಸುವ ಕೆಲವು ವಿಚಿತ್ರ ಅಥವಾ ಅಪರೂಪದ ಬದಲಾವಣೆಗಳು ಹಲವು ರೀತಿಯ ಕ್ಯಾನ್ಸರ್‌ಗಳನ್ನು ಸೂಚಿಸಬಹುದು. ಈ ಲಕ್ಷಣಗಳು ಸಾಮಾನ್ಯವಾಗಿ ನಿರ್ಲಕ್ಷ್ಯಕ್ಕೆ ಒಳಗಾಗುತ್ತವೆ.

ಕಪ್ಪು ಗೆರೆ ಅಥವಾ ಚುಕ್ಕೆ: ನಿಮ್ಮ ಉಗುರುಗಳ ಕೆಳಗೆ ಕಪ್ಪು ಗೆರೆ, ಕಂದು ಬಣ್ಣದ ಗೆರೆ ಅಥವಾ ಚುಕ್ಕೆ ಕಾಣಿಸಿಕೊಂಡರೆ, ಇದು ಚರ್ಮದ ಕ್ಯಾನ್ಸರ್‌ಗೆ (Skin Cancer) ಕಾರಣವಾಗಬಹುದು.

ಇತರೆ ಸೂಚನೆ: ಉಗುರುಗಳ ಬಣ್ಣ ಅಥವಾ ಆಕಾರದಲ್ಲಿನ ಬದಲಾವಣೆಗಳು ಕೆಲವು ಬಾರಿ ಯಕೃತ್ತಿನ ಕ್ಯಾನ್ಸರ್‌ನ (Liver Cancer) ಲಕ್ಷಣಗಳೂ ಆಗಿರಬಹುದು.

ನಿಮ್ಮ ಉಗುರುಗಳಲ್ಲಿ ಯಾವುದೇ ಅಸಾಮಾನ್ಯ, ವಿವರಿಸಲಾಗದ ಮತ್ತು ದೀರ್ಘಕಾಲಿಕ ಬದಲಾವಣೆಗಳು ಕಂಡುಬಂದರೆ, ಅದನ್ನು ಚರ್ಮದ ಅಥವಾ ಯಕೃತ್ತಿನ ಕ್ಯಾನ್ಸರ್‌ನಂತಹ ಗಂಭೀರ ಸಮಸ್ಯೆಯ ಮುನ್ಸೂಚನೆ ಎಂದು ಪರಿಗಣಿಸಿ ತಕ್ಷಣ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.

ನಿರಂತರ ಆಯಾಸ

ಸಾಮಾನ್ಯವಾಗಿ ಕಂಡುಬರುವ ಆಯಾಸವು ಸ್ವಲ್ಪ ವಿಶ್ರಾಂತಿ ತೆಗೆದುಕೊಂಡ ನಂತರ ನಿವಾರಣೆ ಆಗುತ್ತದೆ. ಆದರೆ ನೀವು ದೀರ್ಘಕಾಲದವರೆಗೆ ಹೆಚ್ಚು ದಣಿದಿದ್ದರೆ ಮತ್ತು ಸಾಕಷ್ಟು ವಿಶ್ರಾಂತಿ ಪಡೆದ ನಂತರವೂ ಆಯಾಸವಾಗುತ್ತಲೇ ಇದ್ದರೆ, ಇದು ಗಂಭೀರ ಕಳವಳಕ್ಕೆ ಕಾರಣವಾಗಬಹುದು.

ಕ್ಯಾನ್ಸರ್ ಕೋಶಗಳು ಬೆಳೆಯಲು ದೇಹದಲ್ಲಿನ ಪೋಷಕಾಂಶಗಳನ್ನು ಬಳಸಿಕೊಳ್ಳುವುದರಿಂದ, ಆರೋಗ್ಯಕರ ಜೀವಕೋಶಗಳಿಗೆ ಶಕ್ತಿಯ ಕೊರತೆಯುಂಟಾಗುತ್ತದೆ. ಇದೇ ಕಾರಣಕ್ಕೆ ದೇಹವು ನಿರಂತರವಾಗಿ ದೌರ್ಬಲ್ಯ ಮತ್ತು ಆಯಾಸವನ್ನು ಅನುಭವಿಸುತ್ತದೆ.

ಚಳಿಗಾಲದಲ್ಲಿ ಪದೇ ಪದೇ ಶೀತ, ಕೆಮ್ಮು ಬರುತ್ತಾ? ರೋಗ ನಿರೋಧಕ ಶಕ್ತಿ ಹೆಚ್ಚಿಸುವ ಈ 5 ಅದ್ಭುತ ಮನೆಮದ್ದುಗಳನ್ನು ಇಂದೇ ಟ್ರೈ ಮಾಡಿ!