ಬಿಹಾರ ಚುನಾವಣೆಯ ಫಲಿತಾಂಶ ಬಹುತೇಕ ಹೊರಬಿದ್ದಿದ್ದು, ಎನ್‌ಡಿಎ ಬೃಹತ್‌ ಮುನ್ನಡೆ ಸಾಧಿಸಿ ಅಧಿಕಾರದ ಚುಕ್ಕಾಣಿ ಹಿಡಿಯುವತ್ತ ಹೆಜ್ಜೆ ಹಾಕಿದೆ. ಇನ್ನೇನು ಕೆಲವೇ ಸುತ್ತುಗಳ ಮತಎಣಿಕೆ ಮಾತ್ರ ಬಾಕಿ ಉಳಿದಿದ್ದು, ಎನ್‌ಡಿಎ 197 ಕ್ಷೇತ್ರಗಳಲ್ಲಿ ಮುನ್ನಡೆಯಲ್ಲಿದ್ದು, ಮಹಾಘಟ್‌ಬಂಧನ್‌ 40 ಹಾಗೂ ಇತರೆ ಅಭ್ಯರ್ಥಿಗಳು 6 ಕ್ಷೇತ್ರಗಳಲ್ಲಿ ಮುನ್ನಡೆಯಲ್ಲಿದ್ದಾರೆ.
ಎನ್‌ಡಿಎ ಬಣದಲ್ಲಿನ ಬಿಜೆಪಿ 90 ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿದ್ದು, ಜೆಡಿಯು 78 ಕ್ಷೇತ್ರಗಳಲ್ಲಿ ಮುನ್ನಡೆಯಲ್ಲಿದೆ, ಎಲ್‌ಜೆಪಿ 20 ಕ್ಷೇತ್ರಗಳಲ್ಲಿ, ಎಚ್‌ಎಎಮ್‌ 5 ಕ್ಷೇತ್ರಗಳಲ್ಲಿ ಹಾಗೂ ಆರ್‌ಎಲ್‌ಎಮ್‌ 4 ಕ್ಷೇತ್ರಗಳಲ್ಲಿ ಮುನ್ನಡೆ ಕಾಯ್ದುಕೊಂಡಿದೆ. ಅತ್ತ ಮಹಾಘಟ್‌ಬಂದನ್‌ ಪೈಕಿ ಆರ್‌ಜೆಡಿ 30 ಕ್ಷೇತ್ರಗಳಲ್ಲಿ, ಕಾಂಗ್ರೆಸ್‌ ಕೇವಲ 5 ಕ್ಷೇತ್ರಗಳಲ್ಲಿ ಹಾಗೂ ಲೆಫ್ಟ್‌ 5 ಕ್ಷೇತ್ರಗಳಲ್ಲಿ ಮುನ್ನಡೆಯಲ್ಲಿವೆ.
ಸದ್ಯ ಈ ಅಂಕಿಅಂಶಗಳು ಎಲ್ಲರಲ್ಲೂ ಆಶ್ಚರ್ಯವನ್ನು ಮೂಡಿಸಿವೆ. ಬಿಹಾರದಲ್ಲಿ ಚುನಾವಣೆಯ ಆರಂಭಕ್ಕೂ ಮುನ್ನ ಹಾಗೂ ಮುಕ್ತಾಯದ ಬಳಿಕ ಎನ್‌ಡಿಎ ಹಾಗೂ ಮಹಾಘಟ್‌ಬಂಧನ್‌ ಎರಡೂ ಬಣಗಳ ನಡುವೆ ಜಿದ್ದಾಜಿದ್ದಿನ ಪೈಪೋಟಿ ಇರಲಿದೆ, ಯಾರೇ ಗೆದ್ದರೂ ಸ್ವಲ್ಪ ಮಟ್ಟದ ಅಂತರದಲ್ಲಿ ಗೆಲ್ಲಲಿದ್ದಾರೆ ಎಂದು ಊಹಿಸಲಾಗಿತ್ತು.
ಚುನಾವಣೋತ್ತರ ಸಮೀಕ್ಷೆಗಳು ಸಹ ಎನ್‌ಡಿಎ ಗೆಲ್ಲಲಿದೆ ಆದರೆ ದೊಡ್ಡ ಅಂತರದಲ್ಲಿ ಅಲ್ಲ ಎಂದು ಹೆಚ್ಚಾಗಿ ಹೇಳಿದ್ದವು. ಆದರೆ ಈಗಿನ ಫಲಿತಾಂಶ ಆ ಎಲ್ಲ ಊಹೆ ಹಾಗೂ ಸಮೀಕ್ಷೆಗಳನ್ನೂ ಮೀರಿಸಿದೆ. ಸದ್ಯ ಇದೇ ವಿಷಯ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಚರ್ಚೆಯನ್ನು ಹುಟ್ಟುಹಾಕಿದೆ.
ಅದೇ ರೀತಿ ಸಾಮಾಜಿಕ ಜಾಲತಾಣದಲ್ಲಿ ಧ್ರುವ್‌ ರಾಠಿ ಸಹ ಫಲಿತಾಂಶದ ಕುರಿತು ಮೂರು ಟ್ವೀಟ್‌ ಮಾಡಿ ಮೋಸ ನಡೆದಿದೆ ಎಂದಿದ್ದಾರೆ. ಅರ್ಧದಷ್ಟು ಜನರಿಗೆ ಮೋಸ ಎಂದು ಗೊತ್ತಿರುವಾಗ ಗೆಲ್ಲುವುದರಲ್ಲಿ ಸಂತೋಷವೇಕೆ ಎಂದು ಬರೆದುಕೊಂಡಿದ್ದಾರೆ. ಈ ಮೂಲಕ ಬಿಹಾರದ ಚುನಾವಣೆಯಲ್ಲಿ ಬಿಜೆಪಿಯಿಂದ ಮೋಸ ನಡೆದಿದೆ ಎಂದು ಆರೋಪಿಸಿದ್ದಾರೆ.
ಮತ್ತೊಂದು ಟ್ವೀಟ್‌ನಲ್ಲಿ ಜ್ಞಾನೇಶ್‌ ಕುಮಾರ್‌ ಮಾರ್ಚ್‌ 2024ರಲ್ಲಿ ಚುನಾವಣಾ ಆಯೋಗದ ಅಧ್ಯಕ್ಷರಾಗಿ
ಆಯ್ಕೆಯಾದರು, ಆ ಬಳಿಕ ಏನಾಯಿತೆಂದು ಎಲ್ಲರಿಗೂ ತಿಳಿದೇ ಇದೆ ಎಂದು ಮತ್ತಷ್ಟು ಅನುಮಾನ ಹೊರಹಾಕಿದೆ.
ಬಳಿಕ ಮತ್ತೊಂದು ಟ್ವೀಟ್‌ ಮಾಡಿದ ಧ್ರುವ್‌ ರಾಠಿ ವಿರೋಧ ಪಕ್ಷಗಳು ಚುನಾವಣೆಯನ್ನು ಬಹಿಷ್ಕರಿಸಬೇಕಿತ್ತು. ಎಸ್ಐಆರ್ ಹಾಗೂ ವೋಟ್‌ ಚೋರಿ ಬಳಿಕ ಚುನಾವಣೆಯಲ್ಲಿ ಏನಾಗಲಿದೆ ಎಂಬುದು ಅವರಿಗೆ ಮೊದಲೇ ತಿಳಿದಿತ್ತು ಎಂದು ಬೇಸರ ಹೊರಹಾಕಿದ್ದಾರೆ.
ಇನ್ನು ಇದಕ್ಕೆ ಪ್ರತಿಕ್ರಿಯಿಸಿರುವ ಹಲವರು 101 ಕ್ಷೇತ್ರಗಳಲ್ಲಿ ಕಣಕ್ಕಿಳಿದ ಬಿಜೆಪಿ 90 ಕ್ಷೇತ್ರಗಳಲ್ಲಿ ಗೆಲ್ಲುವುದೆಂದರೆ ಅರ್ಥವೇನು? ಯಾವ ಪಕ್ಷವೂ ಸಹ ಅಷ್ಟು ಸರಾಸರಿ ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಲು ಸಾಧ್ಯವಿಲ್ಲ ಎಂದು ಕಾಮೆಂಟ್‌ ಮಾಡಿದ್ದಾರೆ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.