ಬೆಂಗಳೂರು: ಇದೇ ತಿಂಗಳ 19ರಿಂದ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ ಟೂರ್ನಿ ಆರಂಭವಾಗಲಿದ್ದು, ಕ್ಷಣಗಣನೆ ಆರಂಭವಾಗಿದೆ. ಮೊದಲ ದಿನ ಪಾಕಿಸ್ತಾನ ಹಾಗೂ ನ್ಯೂಜಿಲೆಂಡ್‌ ತಂಡಗಳು ಮುಖಾಮುಖಿಯಾದರೆ, ಭಾರತ ಎರಡನೇ ದಿನ ನಡೆಯಲಿರುವ ಬಾಂಗ್ಲಾದೇಶ ವಿರುದ್ಧದ ಪಂದ್ಯದ ಮೂಲಕ ಟೂರ್ನಿಯಲ್ಲಿ ತನ್ನ ಆಟವನ್ನಾರಂಭಿಸಲಿದೆ.
ಇನ್ನು ಐಸಿಸಿ ಟೂರ್ನಿಗಳೆಂದರೆ ಅವುಗಳಲ್ಲಿ ಭಾರತ ಹಾಗೂ ಪಾಕಿಸ್ತಾನ ತಂಡಗಳ ನಡುವಿನ ಪಂದ್ಯ ಇರಲಿದೆ ಎಂಬುದೇ ವಿಶೇಷ. ಹೀಗಾಗಿಯೇ ಐಸಿಸಿ ಟೂರ್ನಿಗಳು ಬಂತೆಂದರೆ ಕ್ರಿಕೆಟ್ ಪ್ರೇಮಿಗಳಿಗೆ ಹಬ್ಬದ ವಾತಾವರಣ. ಇನ್ನು ಐಸಿಸಿ ಸಹ ಇದನ್ನು ಚೆನ್ನಾಗಿಯೇ ಉಪಯೋಗಿಸಿಕೊಳ್ಳಲಿದ್ದು, ಭಾರತ ಹಾಗೂ ಪಾಕಿಸ್ತಾನ ತಂಡಗಳನ್ನು ಒಂದೇ ಗ್ರೂಪ್‌ನಲ್ಲಿ ಹಾಕಿ ಮುಖಾಮುಖಿಯಾಗುವಂತೆ ಮಾಡುತ್ತಿದೆ.
ಈ ಬಾರಿ ಭಾರತ ಹಾಗೂ ಪಾಕಿಸ್ತಾನ ತಂಡಗಳು ಫೆಬ್ರವರಿ 23ರ ಭಾನುವಾರ ನಡೆಯಲಿದೆ. ಒಂದೆಡೆ ಈ ಪಂದ್ಯದ ಹೈಪ್‌ ಹೆಚ್ಚಾಗುತ್ತಿದ್ದರೆ, ಮತ್ತೊಂದೆಡೆ ಭಾರತದ ಮಾಜಿ ಕ್ರಿಕೆಟಿಗ ಹರ್ಭಜನ್‌ ಸಿಂಗ್‌ ಭಾರತ ಹಾಗೂ ಪಾಕ್ ನಡುವಿನ ಪಂದ್ಯ ಇಷ್ಟು ಹೈಪ್‌ ಕೊಡುವಷ್ಟು ದೊಡ್ಡದಲ್ಲ ಎಂದು ಹೇಳಿಕೆ ನೀಡಿದ್ದಾರೆ.
ಭಾರತ ಹಾಗೂ ಪಾಕಿಸ್ತಾನ ಎರಡೂ ತಂಡಗಳನ್ನು ನೋಡಿದರೆ ಭಾರತ ಬಲಿಷ್ಠ ತಂಡ ಎಂಬುದು ಗೊತ್ತಾಗಲಿದೆ. ಅತ್ತ ಪಾಕಿಸ್ತಾನ ಬಲಿಷ್ಠವಾಗಿಲ್ಲ. ಇತ್ತೀಚೆಗಷ್ಟೆ ತವರಿನಲ್ಲೇ ನಡೆದ ಪಂದ್ಯದಲ್ಲಿ ನ್ಯೂಜಿಲೆಂಡ್‌ ವಿರುದ್ಧ ಹೀನಾಯವಾಗಿ ಸೋತಿದೆ. ಹೀಗಾಗಿ ಇದು ಇಬ್ಬರು ಬಲಿಷ್ಠರ ಕಾಳಗ ಅಲ್ಲ, ಹೆಚ್ಚು ಪ್ರಚಾರ ಬೇಡ ಎಂದು ಹರ್ಭಜನ್‌ ಸಿಂಗ್‌ ತಮ್ಮ ಅಭಿಪ್ರಾಯ ಹೊರಹಾಕಿದ್ದಾರೆ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.