ಕರಾಚಿ: ನಿನ್ನೆ (ಫೆಬ್ರವರಿ 19) ಕರಾಚಿಯ ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆದ ಪಾಕಿಸ್ತಾನ ಹಾಗೂ ನ್ಯೂಜಿಲೆಂಡ್ ತಂಡಗಳ ನಡುವಿನ ಐಸಿಸಿ ಚಾಂಪಿಯನ್ಸ್ ಟ್ರೋಫಿ 2025ರ ಉದ್ಘಾಟನಾ ಪಂದ್ಯದಲ್ಲಿ ಕಿವೀಸ್ 60 ರನ್ಗಳ ಭರ್ಜರಿ ಜಯ ಸಾಧಿಸುವ ಮೂಲಕ ಟೂರ್ನಿಯಲ್ಲಿ ಶುಭಾರಂಭ ಮಾಡಿದೆ.
ಅತ್ತ ಲೀಗ್ ಹಂತದ ಮೂರು ಪಂದ್ಯಗಳ ಪೈಕಿ ಮೊದಲ ಪಂದ್ಯವನ್ನು ಸೋತ ಪಾಕಿಸ್ತಾನಕ್ಕೆ ಸೆಮಿಫೈನಲ್ ಹಾದಿ ಬಲು ಕಠಿಣವಾಗಿ ಪರಿಣಮಿಸಿದ್ದು, ಪಾಕ್ ಯಶಸ್ವಿಯಾಗಿ ಸೆಮಿಫೈನಲ್ ತಲುಪಬೇಕೆಂದರೆ ಭಾರತ ಹಾಗೂ ಬಾಂಗ್ಲಾದೇಶ ತಂಡಗಳ ನಡುವಿನ ಪಂದ್ಯವನ್ನು ಗೆಲ್ಲಲೇಬೇಕಿದೆ.
ಇನ್ನು ಪಾಕ್ನ ಇತ್ತೀಚೆಗಿನ ಪಂದ್ಯಗಳ ಫಲಿತಾಂಶ ಹಾಗೂ ನಿನ್ನೆಯ ಪಂದ್ಯದ ಸೋಲು ಪಾಕ್ ನಾಯಕ ಮೊಹಮ್ಮದ್ ರಿಜ್ವಾನ್ ಅವರ ನಾಯಕತ್ವದ ಆಲೋಚನೆಗಳ ಕುರಿತು ಚರ್ಚೆಯನ್ನು ಹುಟ್ಟುಹಾಕಿವೆ. ರಿಜ್ವಾನ್ ಕಳಪೆ ನಾಯಕತ್ವ ಸಹ ನ್ಯೂಜಿಲೆಂಡ್ ವಿರುದ್ಧದ ಸೋಲಿಗೆ ಕಾರಣವಾಗಿದೆ.
ಹೀಗೆ ನಾಯಕನಾಗಿ ಎಡವಿರುವ ರಿಜ್ವಾನ್ ನ್ಯೂಜಿಲೆಂಡ್ ವಿರುದ್ಧದ ಪಂದ್ಯದಲ್ಲಿ ಆಟಗಾರರ ಜೊತೆ ತಾಳ್ಮೆ ಕಳೆದುಕೊಂಡು ವರ್ತಿಸಿದ ಘಟನೆ ನಡೆದಿದೆ. ಪಂದ್ಯದ 47ನೇ ಓವರ್ ಮಾಡಿದ ಶಾಹಿನ್ ಅಫ್ರಿದಿ ಟಾಮ್ ಲಾಥಮ್ಗೆ ಒಳ್ಳೆಯ ಎಸೆತವನ್ನೇ ಹಾಕಿದರು. ಆದರೆ ಅದು ಔಟ್ಸೈಡ್ ಎಡ್ಜ್ ಆಗಿ ಬೌಂಡರಿ ಹೋಯಿತು. ಈ ಎಸೆತದ ಕುರಿತು ಸ್ಥಳದಲ್ಲಿಯೇ ಅಸಮಾಧಾನ ಹೊರಹಾಕಿದ ರಿಜ್ವಾನ್ ಸನ್ನೆಯಲ್ಲೇ ಕೋಪ ಹೊರಹಾಕಿದ್ದಾರೆ. ಇದಕ್ಕೆ ಹೆಚ್ಚೇನೂ ಉತ್ತರ ನೀಡಲಾಗದ ಅಫ್ರಿದಿ ಔಟ್ ಸೈಡ್ ಎಡ್ಜ್ ಆದರೆ ನಾನೇನು ಮಾಡಲಿ ಎಂಬಂತೆ ಸನ್ನೆಯಲ್ಲೇ ಉತ್ತರ ನೀಡಿದ್ದಾರೆ. ಒಳ್ಳೆಯ ಎಸೆತ ಹಾಕಿ ವಿಕೆಟ್ ಪಡೆಯಲು ಯತ್ನಿಸಿದ ಬೌಲರ್ ಮೇಲೆ ಕಿಡಿಕಾರಿದ ರಿಜ್ವಾನ್ ಅವರದ್ದು ಯಾವ ರೀತಿಯ ನಾಯಕತ್ವ ಎಂಬ ಟೀಕೆ ಶುರುವಾಗಿದೆ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.