ರಾಜಧಾನಿ ಬೆಂಗಳೂರಿನ ಮೂಲಸೌಕರ್ಯವು ಈಗಾಗಲೇ ರಾಜಕೀಯ ಮತ್ತು ಕಾರ್ಪೊರೇಟ್ ವಲಯದ ತೀವ್ರ ಚರ್ಚೆಗೆ ಒಳಪಟ್ಟಿರುವ ಬೆನ್ನಲ್ಲೇ, ಮುಂದಿನ ದಶಕದಲ್ಲಿ ಬೆಂಗಳೂರಿನ ಜನಸಂಖ್ಯೆಯು ಶೇ.20ಕ್ಕಿಂತ ಹೆಚ್ಚು ಏರಿಕೆಯಾಗಿ, 2031ರ ವೇಳೆಗೆ ಬೃಹತ್‌ ಬೆಂಗಳೂರಿನ ನಿವಾಸಿಗಳ ಸಂಖ್ಯೆ ಸುಮಾರು 1.5 ಕೋಟಿಯನ್ನು ತಲುಪುವ ಸಾಧ್ಯತೆಯಿದೆ ಎಂದು ರಾಜ್ಯದ ಅಧಿಕೃತ ದತ್ತಾಂಶ ಬಹಿರಂಗಪಡಿಸಿದೆ.
ಅರ್ಥಶಾಸ್ತ್ರ ಮತ್ತು ಸಾಂಖ್ಯಿಕ ನಿರ್ದೇಶನಾಲಯದ ಪ್ರಕಾರ, 2021ರಲ್ಲಿ ಸುಮಾರು 1.22 ಕೋಟಿಯಷ್ಟಿದ್ದ ಬೆಂಗಳೂರಿನ ಜನಸಂಖ್ಯೆಯು 2031ರ ವೇಳೆಗೆ 1.47 ಕೋಟಿ (ಸುಮಾರು 1.5 ಕೋಟಿ) ತಲುಪುವ ನಿರೀಕ್ಷೆಯಿದೆ. ಈ ಹೆಚ್ಚಳವು ಕೇವಲ 10 ವರ್ಷಗಳಲ್ಲಿ ಶೇ. 20.4ರಷ್ಟು ಆಗಲಿದೆ.
ವಿಶೇಷವಾಗಿ 2025 ಮತ್ತು 2026ರ ನಡುವೆ ಬೆಂಗಳೂರಿನಲ್ಲಿ ನಿರೀಕ್ಷಿತ ಜನಸಂಖ್ಯಾ ಬೆಳವಣಿಗೆಯು ಒಂದೇ ವರ್ಷದಲ್ಲಿ ಶೇ.1.93ರಷ್ಟಿದ್ದು, ಇದು ಕರ್ನಾಟಕದ ನಗರಗಳಲ್ಲೇ ಆತ್ಯಧಿಕವಾಗಿದೆ. ನಗರದ ಈ ನಿರಂತರ ಜನಸಂಖ್ಯಾ ಏರಿಕೆಗೆ ಅದರ ಬಲವಾದ ವಲಸೆ ಆಕರ್ಷಣೆ, ಅದರಲ್ಲೂ ಮುಖ್ಯವಾಗಿ ವೈವಿಧ್ಯಮಯ ಮತ್ತು ಗಟ್ಟಿಯಾದ ಉದ್ಯೋಗ ಮಾರುಕಟ್ಟೆಯೇ ಪ್ರಮುಖ ಕಾರಣ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
2021ರಲ್ಲಿ ರಾಜ್ಯದ ಒಟ್ಟು ಜನಸಂಖ್ಯೆಯಲ್ಲಿ ಬೆಂಗಳೂರಿನ ಪಾಲು ಶೇ.18.2 ರಷ್ಟಿತ್ತು. ಇದು 2031ರ ವೇಳೆಗೆ ಶೇ.20.7ಕ್ಕೆ ಏರಿಕೆಯಾಗುವ ಸಾಧ್ಯತೆ ಇದೆ. ಈ ದತ್ತಾಂಶವು ರಾಜಧಾನಿಯ ಮೇಲಿನ ಒತ್ತಡವನ್ನು ತಗ್ಗಿಸಲು ಮತ್ತು ರಾಜ್ಯದ ಇತರೆ ನಗರ ಕೇಂದ್ರಗಳನ್ನು ಬಲಪಡಿಸುವ ತುರ್ತು ಅಗತ್ಯವನ್ನು ಒತ್ತಿಹೇಳುತ್ತದೆ.
ರಾಜ್ಯ ರಾಜಧಾನಿಯ ಹೊರಗಿನ ನಗರ ಪ್ರದೇಶಗಳು ಸಹ ಇದೇ ರೀತಿಯ ಪ್ರವೃತ್ತಿಯನ್ನು ತೋರಿಸುತ್ತಿವೆ. ಕರ್ನಾಟಕದ ಒಟ್ಟಾರೆ ನಗರ ಪಾಲು 2021ರಲ್ಲಿ ಸುಮಾರು ಶೇ.43.9 ರಿಂದ 2031ರ ವೇಳೆಗೆ ಸುಮಾರು ಶೇ.47.8ಕ್ಕೆ ಹೆಚ್ಚಾಗುವ ನಿರೀಕ್ಷೆಯಿದೆ.
Discover more from ಕರುನಾಡ ಸುದ್ದಿ - ಅತ್ಯುತ್ತಮ ಕನ್ನಡ ಸುದ್ದಿಗಳಿಗಾಗಿ
Subscribe to get the latest posts sent to your email.