ಮುಂದಿನ 5–10 ವರ್ಷಗಳಲ್ಲಿ ತಾಮ್ರಕ್ಕೆ ಚಿನ್ನದ ಮೌಲ್ಯ?ತಾಮ್ರದ ದರ ಚಿನ್ನದ ಮಟ್ಟಕ್ಕೆ ಏರಲಿದೆಯೇ?

ಬೆಂಗಳೂರು: ಕಳೆದ ಒಂದು ವರ್ಷದಿಂದ ಹೂಡಿಕೆದಾರರ ಪಾಲಿಗೆ ಚಿನ್ನ ಮತ್ತು ಬೆಳ್ಳಿ ಅತ್ಯುತ್ತಮ ಲಾಭ ತಂದುಕೊಟ್ಟಿವೆ. ಆದರೆ, 2026ರ ಹೊತ್ತಿಗೆ ಕಮೊಡಿಟಿ ಮಾರುಕಟ್ಟೆಯ ಚಿತ್ರಣ ಬದಲಾಗಲಿದ್ದು, ‘ತಾಮ್ರ’ (Copper) ಹೊಸ ದಾಖಲೆ ಬರೆಯಲು ಸಜ್ಜಾಗಿದೆ ಎಂದು ಮಾರುಕಟ್ಟೆ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ,

ತಾಮ್ರವೇ ‘ಮುಂದಿನ ದೊಡ್ಡ ಹೂಡಿಕೆ’ ಏಕೆ?

ನಿರ್ಮಲ್ ಬಾಂಗ್ ಸೆಕ್ಯೂರಿಟೀಸ್‌ನ ಕುನಾಲ್ ಶಾ ಮತ್ತು ಆರ್‌ಕೆಬಿ ವೆಂಚರ್ಸ್‌ನ ರಾಕೇಶ್ ಬನ್ಸಾಲ್ ಅವರಂತಹ ತಜ್ಞರ ಪ್ರಕಾರ, ತಾಮ್ರವು ಇನ್ನು ಕೇವಲ ಕೈಗಾರಿಕಾ ಲೋಹವಾಗಿ ಉಳಿದಿಲ್ಲ. ಭವಿಷ್ಯದ ತಂತ್ರಜ್ಞಾನ ಮತ್ತು ಪರಿಸರ ಸ್ನೇಹಿ ಯೋಜನೆಗಳಿಗೆ ಇದು ಜೀವನಾಡಿಯಾಗಿದೆ.

ತಾಮ್ರದ ಈ ಅನಿರೀಕ್ಷಿತ ಬೆಲೆ ಏರಿಕೆಯ ಹಿಂದೆ ಮೂರು ಪ್ರಮುಖ ತಾಂತ್ರಿಕ ಕಾರಣಗಳಿವೆ.

ಮೊದಲನೆಯದಾಗಿ, ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಕ್ರಾಂತಿಯಿಂದಾಗಿ ಜಗತ್ತಿನಾದ್ಯಂತ ಬೃಹತ್ ಡೇಟಾ ಸೆಂಟರ್‌ಗಳು ನಿರ್ಮಾಣವಾಗುತ್ತಿದ್ದು, ಇವುಗಳ ಕಾರ್ಯಕ್ಷಮತೆಗೆ ಭಾರಿ ಪ್ರಮಾಣದ ತಾಮ್ರದ ವೈರಿಂಗ್ ಅಗತ್ಯವಿದೆ.

ಎರಡನೆಯದಾಗಿ, ಪರಿಸರ ಸ್ನೇಹಿ ಎಲೆಕ್ಟ್ರಿಕ್ ವಾಹನಗಳ (EV) ಉತ್ಪಾದನೆಯಲ್ಲಿ ತಾಮ್ರದ ಪಾತ್ರ ದೊಡ್ಡದು; ಸಾಮಾನ್ಯ ಪೆಟ್ರೋಲ್ ವಾಹನಗಳಿಗೆ ಹೋಲಿಸಿದರೆ ಇವುಗಳಲ್ಲಿ ನಾಲ್ಕು ಪಟ್ಟು ಹೆಚ್ಚು ತಾಮ್ರವನ್ನು ಬಳಸಲಾಗುತ್ತದೆ.

ಕೊನೆಯದಾಗಿ, ಜಾಗತಿಕವಾಗಿ ಹೆಚ್ಚುತ್ತಿರುವ ಹಸಿರು ಇಂಧನ ಯೋಜನೆಗಳಾದ ಸೌರಶಕ್ತಿ ಮತ್ತು ಪವನ ಶಕ್ತಿ ಉತ್ಪಾದನಾ ಘಟಕಗಳಲ್ಲಿ ತಾಮ್ರವು ಅತ್ಯಗತ್ಯ ಮತ್ತು ಅನಿವಾರ್ಯ ಲೋಹವಾಗಿದೆ. ಈ ಹೊಸ ತಲೆಮಾರಿನ ತಂತ್ರಜ್ಞಾನಗಳೇ ತಾಮ್ರವನ್ನು ಭವಿಷ್ಯದ ಆಯಕಟ್ಟಿನ ಹೂಡಿಕೆಯನ್ನಾಗಿ ಮಾಡುತ್ತಿವೆ.

ಬೆಲೆ ಏರಿಕೆಯ ಅಂದಾಜು: ಲಕ್ಷಾಧಿಪತಿಗಳಾಗಲು ಇದುವೇ ದಾರಿ?

ಅಂತರರಾಷ್ಟ್ರೀಯ ಮತ್ತು ದೇಶೀಯ ಮಾರುಕಟ್ಟೆಯಲ್ಲಿ ತಾಮ್ರದ ಬೆಲೆ ಗಗನಕ್ಕೇರುವ ಮುನ್ಸೂಚನೆ ಇದೆ:

ಜಾಗತಿಕ ಮಾರುಕಟ್ಟೆ (LME): ಪ್ರತಿ ಮೆಟ್ರಿಕ್ ಟನ್‌ಗೆ $13,500 ರಿಂದ $14,000 ತಲುಪುವ ಸಾಧ್ಯತೆಯಿದೆ. ಈಗಾಗಲೇ 2025ರಲ್ಲಿ ಬೆಲೆ ಶೇ. 35ರಷ್ಟು ಏರಿಕೆಯಾಗಿದೆ.

ಭಾರತೀಯ ಮಾರುಕಟ್ಟೆ (MCX): ಪ್ರತಿ ಕೆಜಿಗೆ ₹1,300 ರಿಂದ ₹1,350 ವರೆಗೆ ಬೆಲೆ ಏರಬಹುದು ಎಂದು ಅಂದಾಜಿಸಲಾಗಿದೆ.

ತಾಮ್ರದ ಬೆಲೆ ಏರಿಕೆಗೆ ಕೇವಲ ಬೇಡಿಕೆ ಮಾತ್ರವಲ್ಲದೆ, ಪೂರೈಕೆಯಲ್ಲಿ ಉಂಟಾಗಿರುವ ತೀವ್ರ ಕೊರತೆಯೂ ಪ್ರಮುಖ ಕಾರಣವಾಗಿದೆ. ಮಾರುಕಟ್ಟೆ ವರದಿಗಳ ಪ್ರಕಾರ, 2025ರ ವೇಳೆಗೆ ಜಾಗತಿಕವಾಗಿ ಸುಮಾರು 1.24 ಕೋಟಿ ಟನ್ ತಾಮ್ರದ ಕೊರತೆ ಎದುರಾಗುವ ಭೀತಿ ಇದ್ದು, ಉತ್ಪಾದನೆಯಲ್ಲಿನ ಈ ಕುಸಿತವು ಹೂಡಿಕೆದಾರರಿಗೆ ವರದಾನವಾಗಿ ಪರಿಣಮಿಸಲಿದೆ.

ಭಾರತದ ಮಟ್ಟಿಗೆ ಹೇಳುವುದಾದರೆ, ಸರ್ಕಾರಿ ಸ್ವಾಮ್ಯದ ಹಿಂದೂಸ್ತಾನ್ ಕಾಪರ್ ದೇಶದ ಮುಂಚೂಣಿ ಉತ್ಪಾದಕ ಸಂಸ್ಥೆಯಾಗಿದ್ದರೂ, ದಿನೇ ದಿನೇ ಹೆಚ್ಚುತ್ತಿರುವ ದೇಶೀಯ ಬೇಡಿಕೆಯನ್ನು ಸೀಮಿತ ಉತ್ಪಾದನೆಯ ಮೂಲಕ ಪೂರೈಸುವುದು ದೊಡ್ಡ ಸವಾಲಾಗಿದೆ. ಈ ಪೂರೈಕೆ ಮತ್ತು ಬೇಡಿಕೆಯ ನಡುವಿನ ಭಾರಿ ಅಂತರವೇ ಮುಂಬರುವ ದಿನಗಳಲ್ಲಿ ತಾಮ್ರದ ದರವನ್ನು ಮತ್ತಷ್ಟು ಏರಿಸುವ ಸಾಧ್ಯತೆಯಿದೆ

ಚಿನ್ನ ಮತ್ತು ಬೆಳ್ಳಿಯ ಕಥೆಯೇನು?

2025ರಲ್ಲಿ ಈ ಅಮೂಲ್ಯ ಲೋಹಗಳು 2026ರ ಗುರಿಯನ್ನು ಒಂದು ವರ್ಷ ಮುಂಚಿತವಾಗಿಯೇ ತಲುಪಿವೆ. ಜಪಾನ್‌ನ ಆರ್ಥಿಕ ನೀತಿಗಳು ಮತ್ತು ‘ಗೋಲ್ಡ್-ಬ್ಯಾಕ್ಡ್ ಕ್ರಿಪ್ಟೋಕರೆನ್ಸಿ’ಗಳ ಉದಯದಿಂದಾಗಿ ಇವುಗಳಿಗೆ ಬೆಂಬಲ ಸಿಕ್ಕಿದೆ. ಆದರೆ, ಲಾಭದ ಶೇಕಡಾವಾರು ಪ್ರಮಾಣದಲ್ಲಿ ತಾಮ್ರವು ಇವುಗಳನ್ನು ಮೀರಿಸಲಿದೆ ಎನ್ನಲಾಗುತ್ತಿದೆ.ತಾಮ್ರವಿಲ್ಲದೆ ಹಸಿರು ಇಂಧನದ ಭವಿಷ್ಯವಿಲ್ಲ. ಚಿನ್ನ-ಬೆಳ್ಳಿಯಂತೆ ಈಗ ತಾಮ್ರವೂ ಹೂಡಿಕೆದಾರರಿಗೆ ‘ಸೇಫ್ ಹೆವನ್’ ಆಗಿ ಬದಲಾಗುತ್ತಿದೆ, ಎನ್ನುತ್ತಾರೆ ರಾಕೇಶ್ ಬನ್ಸಾಲ್

ಚಿನ್ನದ ಬೆಲೆ ಒಂದೇ ದಿನ 3,200 ರೂ.   ಏರಿಕೆಯಾದ ಚಿನ್ನದ ದರ: ಇಂದಿನ ಬೆಲೆ ಎಷ್ಟು ಗೊತ್ತಾ?