ನವದೆಹಲಿ: ಭಾರತೀಯ ಕ್ರಿಕೆಟ್ನ ಭರವಸೆಯ ಆಟಗಾರ, 14 ವರ್ಷದ ವೈಭವ್ ಸೂರ್ಯವಂಶಿ ಅವರಿಗೆ ದೇಶದ ಅತ್ಯುನ್ನತ ಮಕ್ಕಳ ಗೌರವವಾದ ‘ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರ’ ನೀಡಿ ಸನ್ಮಾನಿಸಲಾಗಿದೆ. ಶುಕ್ರವಾರ ರಾಷ್ಟ್ರಪತಿ ಭವನದಲ್ಲಿ ನಡೆದ ಅದ್ಧೂರಿ ಸಮಾರಂಭದಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ವೈಭವ್ ಸೇರಿದಂತೆ ಒಟ್ಟು 20 ಮಕ್ಕಳಿಗೆ ಈ ಪ್ರಶಸ್ತಿ ಪ್ರದಾನ ಮಾಡಿದರು.
ಬಿಹಾರ ಮೂಲದ ಈ 14 ವರ್ಷದ ಬಾಲಕ, ತನ್ನ ಅದ್ಭುತ ಬ್ಯಾಟಿಂಗ್ ಕೌಶಲದ ಮೂಲಕ ಈಗಾಗಲೇ ಕ್ರಿಕೆಟ್ ಜಗತ್ತಿನ ಗಮನ ಸೆಳೆದಿದ್ದಾನೆ. ಅತಿ ಕಿರಿಯ ವಯಸ್ಸಿನಲ್ಲಿಯೇ ಪ್ರಥಮ ದರ್ಜೆ ಕ್ರಿಕೆಟ್ ಮತ್ತು ಐಪಿಎಲ್ ಹರಾಜಿನಲ್ಲೂ ಸುದ್ದಿಯಾಗಿದ್ದ ವೈಭವ್, ಕ್ರೀಡಾ ಕ್ಷೇತ್ರದಲ್ಲಿನ ಅಸಾಧಾರಣ ಸಾಧನೆಗಾಗಿ ಈ ಗೌರವಕ್ಕೆ ಪಾತ್ರರಾಗಿದ್ದಾರೆ.
ಪ್ರಶಸ್ತಿ ಸ್ವೀಕರಿಸುವ ಸಲುವಾಗಿ ಮಣಿಪುರ ವಿರುದ್ಧದ ವಿಜಯ್ ಹಜಾರೆ ಟ್ರೋಫಿ ಪಂದ್ಯವನ್ನು ಕೈಬಿಟ್ಟಿದ್ದ ವೈಭವ್, ಇದೀಗ ಜನವರಿ 15 ರಿಂದ ಆರಂಭವಾಗಲಿರುವ U19 ವಿಶ್ವಕಪ್ ಗಾಗಿ ಭಾರತ ತಂಡವನ್ನು ಸೇರಿಕೊಳ್ಳಲಿದ್ದಾರೆ.
ವೈಭವ್ ಅವರ ಈವರೆಗಿನ ಸಾಧನೆಯ ಸಂಕ್ಷಿಪ್ತ ನೋಟ:
ಪ್ರಥಮ ದರ್ಜೆ ಕ್ರಿಕೆಟ್: 8 ಪಂದ್ಯಗಳಲ್ಲಿ 207 ರನ್ (ಗರಿಷ್ಠ ಸ್ಕೋರ್ 93).
ಲಿಸ್ಟ್-ಎ ಕ್ರಿಕೆಟ್: 7 ಪಂದ್ಯಗಳಲ್ಲಿ 46ರ ಸರಾಸರಿಯಲ್ಲಿ 322 ರನ್ (ಗರಿಷ್ಠ ಸ್ಕೋರ್ 190).
T20 ಕ್ರಿಕೆಟ್: 18 ಪಂದ್ಯಗಳಲ್ಲಿ 701 ರನ್ (ಗರಿಷ್ಠ 144).
IPL ವೃತ್ತಿಜೀವನ: 7 ಪಂದ್ಯಗಳಲ್ಲಿ 252 ರನ್ (ಗರಿಷ್ಠ 101).
ನಿಮ್ಮ ಪ್ರತಿಭೆ ಇಡೀ ರಾಷ್ಟ್ರಕ್ಕೆ ಸ್ಫೂರ್ತಿ. ಇಲ್ಲಿರುವ ಪ್ರತಿಯೊಂದು ಮಗುವೂ ದೇಶದ ಹೆಮ್ಮೆ, ಎಂದು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಈ ಸಂದರ್ಭದಲ್ಲಿ ಮಕ್ಕಳನ್ನು ಶ್ಲಾಘಿಸಿದರು.
ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರದ ಹಿನ್ನೆಲೆ
ಕೇಂದ್ರ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯವು 1996 ರಿಂದ ಈ ಪ್ರಶಸ್ತಿಯನ್ನು ನೀಡುತ್ತಾ ಬಂದಿದೆ.
ಯಾರಿಗೆ ನೀಡಲಾಗುತ್ತದೆ?: 5 ರಿಂದ 18 ವರ್ಷದೊಳಗಿನ ಅಸಾಧಾರಣ ಸಾಧನೆ ಮಾಡಿದ ಮಕ್ಕಳಿಗೆ.
ಕ್ಷೇತ್ರಗಳು: ಶೌರ್ಯ, ಕಲೆ ಮತ್ತು ಸಂಸ್ಕೃತಿ, ಪರಿಸರ, ನಾವೀನ್ಯತೆ, ವಿಜ್ಞಾನ ಮತ್ತು ತಂತ್ರಜ್ಞಾನ, ಸಮಾಜ ಸೇವೆ ಹಾಗೂ ಕ್ರೀಡೆ.
ಪ್ರಶಸ್ತಿ ಮೊತ್ತ: 1 ಲಕ್ಷ ರೂಪಾಯಿ ನಗದು, ಪದಕ ಮತ್ತು ಪ್ರಮಾಣಪತ್ರ.
ವಿಶೇಷತೆ: ಪ್ರಶಸ್ತಿ ವಿಜೇತರು ಗಣರಾಜ್ಯೋತ್ಸವದ ಪಥಸಂಚಲನದಲ್ಲಿ ಭಾಗವಹಿಸುವ ಅವಕಾಶ ಪಡೆಯುತ್ತಾರೆ.
ವೀರ ಬಾಲ ದಿವಸ್’ ಮಹತ್ವ
ಸಿಖ್ಖರ 10ನೇ ಗುರು, ಗುರು ಗೋವಿಂದ ಸಿಂಗ್ ಅವರ ಪುತ್ರರಾದ (ಸಾಹಿಬ್ಜಾದಾಸ್) ಅಜಿತ್ ಸಿಂಗ್, ಜುಝಾರ್ ಸಿಂಗ್, ಜೊರಾವರ್ ಸಿಂಗ್ ಮತ್ತು ಫತೇ ಸಿಂಗ್ ಅವರ ತ್ಯಾಗದ ನೆನಪಿಗಾಗಿ ಪ್ರತಿವರ್ಷ ಡಿಸೆಂಬರ್ 26 ರಂದು ‘ವೀರ ಬಾಲ ದಿವಸ್’ ಆಚರಿಸಲಾಗುತ್ತದೆ. ಪ್ರಧಾನಿ ಮೋದಿ ಅವರು 2022 ರಲ್ಲಿ ಈ ದಿನದ ಘೋಷಣೆ ಮಾಡಿದ್ದರು. ಇದೇ ಸಂದರ್ಭದಲ್ಲಿ ಮಕ್ಕಳ ಸಾಧನೆಯನ್ನು ಗುರುತಿಸಿ ಗೌರವಿಸಲಾಗುತ್ತದೆ.
ಬಾಯ್ಮಾತಿನ ಭರವಸೆ ನಂಬಿ ₹26 ಲಕ್ಷದ ಆಫರ್ ಕೈಬಿಟ್ಟ ಉದ್ಯೋಗಿ: ಕೊನೆಗೆ ಕಂಪನಿ ಕೊಟ್ಟ ಶಾಕ್ ಎಂತದ್ದು ಗೊತ್ತಾ?